КФУда сурдотәрҗемәчеләр әзерләячәкләр

Быел яңа юнәлеш буенча 13 кеше белем алачак, алар өч фәннән БДИ нәтиҗәләре буенча сайлап алыначак.

Фото: Денис Гордийко

(Казан шәһәре KZN.RU, 26 нчы апрель). Казан федераль университетында сурдотәрҗемәчеләр әзерләү буенча бакалавриат программасы ачыла. Быел 13 кеше әлеге юнәлеш буенча беренче тапкыр укый башлаячак.

КФУның Филология һәм мәдәниятара коммуникацияләр институтының «Рус ишарә теле: тәрҗемә теориясе һәм практикасы» юнәлеше буенча көндезге-читтән торып уку форматындагы программа 4,5 елга исәпләнгән. Белем бирү процессы студентлар өчен рус һәм инглиз телләрендә оештырылачак.

Керү өчен өч фән – рус һәм чит тел, шулай ук сайлап алу өчен бер фән (тарих, әдәбият, җәмгыять белеме, информатика, мәгълүмати һәм коммуникацион технологияләр) буенча бердәм дәүләт имтиханын уңышлы тапшырырга кирәк.

Бакалавриатның яңа программасын ачу Бөтенроссия начар ишетүчеләр җәмгыяте белән бергә гамәлгә ашырылган. Төркемнең кураторы Мәскәү дәүләт лингвистика университеты лингвисты Анна Комарова булачак, дип хәбәр итә КФУ матбугат хезмәте.

Шулай ук укыгыз

Барлык яңалыклар