Керчь шәһәрендә Тимер юлчылар мәдәният йорты тәрбияләнүчеләре «Володя Дубинин урамы» спектаклен тәкъдим иттеләр

Премьераны 1 меңнән артык тамашачы карады

Казан Тимер юлчылар мәдәният йортының клуб формированиеләрендә тәрбияләнүчеләр Керчь шәһәрендә «Володя Дубинин урамы» спектакленең премьерасын тәкъдим иттеләр. «Корабел» мәдәният йортында куелышны 1 меңнән артык тамашачы карады.

Спектакльне күрсәтү өчен 25 казанлы Керчь шәһәренә өч микроавтобуста китте. Алар арасында – «ЛУЧ – люди, умеющие чувствовать» инклюзив иҗади лабораториясе, «Везунчик» балалар театр студиясе, шулай ук «Уңыш» кызыксынулар буенча клубның тормыш сөючеләре. Шулай ук алар белән бергә сәхнәдә «РОСТ» берләшмәсенең Керчь филиалыннан үзенчәлекле балалар һәм аларның әти-әниләре чыгыш ясады.

Спектакль Бөек Ватан сугышының фаҗигале вакыйгаларын яңарта.

Куелыш пионер – Бөек Ватан сугышы герое Володя Дубининга багышлана. Яшь каһарман инде 14 яшендә Иске Карантин таш кисү урынында элемтәче һәм разведчик була. Бу – яшь геройның куркусызлыгы, аның фидакарьлеге һәм Ватанга тугрылыгы турындагы тарих. 1942 елның 2 гыйнварында ул мина шартлап һәлак була.

Спектакльне тудыруда Россиянең берничә шәһәреннән мәдәният эшлеклеләре катнашты. Сценарийны Муром курчак театры студияләренең берсе тәкъдим итте, Казанда режиссер-куючы ТРның атказанган мәдәният хезмәткәре, инклюзив иҗади лаборатория җитәкчесе Вероника Зайцева булды.

«Минем өчен бу куелыш үзенчәлекле, чөнки мин Керчьта тудым һәм пионер-геройның апасы белән аралашкан идем. Ул очрашу турындагы җылы хатирәләр спектакльне нәкъ менә Володя турында куярга этәрде. Без инде яңа планнар билгеләдек һәм спектакльне тагын да күбрәк балаларга күрсәтү өчен администрациягә «Артек» лагерена сәфәр оештырырга тәкъдим иттек. Шулай ук спектакльне бу ел ахырына кадәр Белоруссиядә күрсәтү планлаштырыла», – дип уртаклашты Вероника Зайцева.

Казанда спектакльнең премьерасы 11 апрельдә узды, һәвәскәр актерлар моңа өч ай дәвамында әзерләнделәр. Катнашучылар мөстәкыйль рәвештә сугыш еллары реквизитларын эзләделәр һәм аларны үзләре булдырдылар.

Шулай ук укыгыз

Барлык яңалыклар