Ленин исемендәге мәдәни-күңел ачу комплексында казанлыларга Андрей Кончаловскийның «Гашыйклар турында романс» фильмы күрсәтеләчәк

Кино күрсәтү ишетү һәм күрү сәләтләре чикле кешеләр өчен тифлокомментарийлар һәм субтитрлар белән узачак.

(Казан шәһәре KZN.RU, 18-нче октябрь). 24-нче октябрь көнне Ленин исемендәге мәдәни-күңел ачу комплексында казанлыларга Андрей Кончаловскийның «Гашыйклар турында романс» фильмы күрсәтеләчәк Кинотасма ишетү һәм күрү сәләте чикле кешеләр өчен тифлокомментарийлар һәм субтитрлар белән тәкъдим ителәчәк.

Фильмда Евгений Киндинов, Елена Коренева, Ирина Купченко, Иннокентий Смоктуновский, Владимир Конкин, Александр Збруев кебек танылган артистлар төшкән. Картинаның музыкаль бизәлеше өстендә композитор Александр Градский эшләгән, ә җыр текстларын Николай Глазков, Наталья Кончаловская һәм Булат Окуджава язган.

Кино куелышының махсус кунагы Казанда Халыкара яшьләр кинофестиваленең программа директоры, кино белгече Адилә Хәйбуллина булачак. Бөтенләй күрмәүчеләр һәм начар күрүчеләр өчен Республика махсус китапханәсе белән берлектә оештырылган сеанс 19.00 сәгатькә планлаштырылган, дип хәбәр итә «Кино вакыты» дирекциясенең матбугат хезмәте. Чарага керү ирекле.

Быел 1974 елда Карл Варларында узган фестивальдә фильмның премьерасы куелуга 45 ел тула, анда картина югары бүләккә ия булган – «Бәллүр глобус» алган. Президент грантлары фонды программасын тормышка ашыру кысаларында Андрей Кончаловский фонды тавыш һәм сурәтне тулысынча торгызу, шулай ук махсус субтитрлар һәм тифлокомментарийлар эшләү белән кинофильмны реставрацияләүне башкарган.

Шулай ук укыгыз

Барлык яңалыклар