Казан Ратушасында Фәләстыйнның Хеврон провинциясе делегациясе белән очрашу узды

Яклар хезмәттәшлек перспективалары турында фикер алыштылар.

(Казан шәһәре KZN.RU, 10-нчы декабрь, Алинә Бережная). Бүген Казан Ратушасында ТР башкаласы Башкарма комитеты вәкилләренең Фәләстыйнның Хеврон провинциясе делегациясе белән очрашуы узды. Яклар хезмәттәшлек перспективалары турында фикер алыштылар – очрашуда Фәләстыйнның инвестицион компанияләре һәм җитештерү предприятиеләре, Санкт-Петербургтагы Гарәп мәдәни үзәге вәкилләре катнашты.

Фәләстыйннан килгән кунакларга сәламләү сүзе белән Казан муниципаль берәмлеге башлыгының беренче урынбасары Евгения Лодвигова мөрәҗәгать итте. Ул билгеләп үткәнчә, ТР башкаласы Мәскәү һәм Санкт-Петербургтан кала студентлар саны буенча өченче урында тора. Моннан тыш, шәһәр илнең спорт башкаласы статусына ия, анда күп тапкырлар зур халыкара ярышлар үткәрелгән, алар арасында Универсиада, Спортның су төрләре буенча дөнья чемпионаты, футбол буенча дөнья чемпионаты һәм башкалар бар. «Болар барысы да туристлар агымын арттырырга мөмкинлек бирә», - диде Е.Лодвигова. Ул шулай ук Казанда 115 милләт вәкиле яшәвен дә өстәде. «Безнең шәһәр - толерантлык үрнәге, без моның белән горурланабыз һәм аны сакларга тырышабыз», - дип ассызыклады Казан вице-мэры.

Казан халыкара аренада да хезмәттәшлек итә. «Безнең тәҗрибә дөньяның башка шәһәрләренә дә кызыклы, «Берләшкән шәһәрләр һәм җирле хакимиятләр» бөтендөнья оешмасының Евразия бүлегенең штаб-фатиры очраклы гына Казанда урнашмаган, аңа дөньяның 12 иленнән 300-дән артык шәһәр керә», - диде Е.Лодвигова. Исегезгә төшерәбез, бу елда Казан Мэры Илсур Метшин БМО каршындагы җирле хакимият органнары консультатив комитеты президенты итеп сайланды.

Хеврон Джибрин провинциясе губернаторы Ильяс Абед Әл-Бакри шәһәр һәм республика җитәкчелегенә җылы кабул итүләре өчен рәхмәт белдерде һәм Казанның шәһәрләрнең ничек үсәргә тиешлегенең үрнәге дип атады. «Без ышанабыз ки, бу визит киләчәк хезмәттәшлек өчен нигез булачак. Казан динамик рәвештә үсә, сезнең тәҗрибәне кулланырга кирәк, без аны коралландырырга әзер», - диде ул.

Джибрин Ильяс Абед Әл-Бакри сөйләвенчә, 750 мең кеше яшәгән Хеврон Фәләстыйн провинцияләре арасында халык саны буенча беренче урында тора. Илдәге сәяси низагларга карамастан, провинциядә икътисад һәм сәүдә актив үсә. Аерым игътибар авыл хуҗалыгына - виноград һәм зәйтүн агачлары үстерүгә бирелә.

Казан кебек үк Хеврон да туризмны үстерү белән актив шөгыльләнә. Бу хакта бүген ТР Хөкүмәте йортында узган республика киңәшмәсендә ТР Төзелеш, архитектура һәм ТКХ министры Ирек Фәйзуллин хәбәр итте.

Очрашуны тәмамлап, Евгения Лодвигова делегациягә визиты өчен рәхмәт белдерде, ул Фәләстыйн халкына тынычлык теләде һәм хезмәттәшлеккә өмет белдерде.

Очрашуда Икътисади үсеш комитеты рәисе Артур Вәлиәхмәтов, Мәдәният идарәсе башлыгы Азат Абзалов, ТР сәнәгать һәм сәүдә министры урынбасары Герман Лернер, Бөтендөнья татар конгрессының Казан бүлеге рәисе Фәрит Мифтахов, Фәләстыйн Дәүләтенең Россия Федерациясендәге Гадәттән тыш һәм тулы вәкаләтле Илчесе ярдәмчесе Әбу Салех Самир һәм башкалар катнашты.