Казан Ратушасында «Күңелнең ефәк юлы» күргәзмәсе ачыла

Экспозиция белән 31-нче майдан 14-нче июльгә кадәр танышырга мөмкин булачак.

(Казан шәһәре KZN.RU, 30-нчы май). 31-нче майда Казан Ратушасының «Тәрәзә» заманча сәнгать галереясендә рәссам Марат Гобәйдуллинның «Күңелнең ефәк юлы» дигән шәхси күргәзмәсе ачыла. Экспозиция тамашачыларны төрки цивилизациянең матурлыгы һәм бөек Ефәк юлы маршруты белән таныштырачак.

Бөек Болгар, Бакчасарай һәм Солхат, Төркестан, Сәмәрканд һәм Бjхара күренешләре белән этюдлар сериясен Марат Гобәйдуллин төрле һава шартларында табигатьтә яза. Идел ярларын Ул Казаннан Болгарга кадәр барганда яхтадан карап сурәтләгән. Күргәзмә эшләре арасында Төркия пейзажлары да, шулай ук таулы Кырым – Солхат һәм Бакчасарай күренешләре дә бар. Моннан тыш, экспозициядә Татарстан һәм шамаил тарихы темасына иҗат эшләр тәкъдим ителгән.

Күргәзмә 14-нче июльгә кадәр һәр көнне 11.00 сәгатьтән 19.00 сәгатькә кадәр барачак, дип хәбәр иттеләр «Тәрәзә» Хәзерге заман сәнгать галереясендә.

Шулай ук укыгыз

Барлык яңалыклар