Казан зоопаркында фламинголар урнашкан – аларга туралган яшелчә, ит һәм балык фаршы ашаталар

Әлегә кошлар соры-ак төстә, каурыйларының төсе туклануга һәм яшькә бәйле.

Фото: Марат Мугинов

(Казан шәһәре KZN.RU, 4-нче август, Камилә Гобәйдуллина). «Замбези елгасы» Казан зоопаркында алсу фламинголар урнашкан Озак көтелгән кошлар безгә июнь аенда Амман (Иордания) шәһәреннән килгән. Алар инде утыз көнлек карантин үткән һәм зоопаркка килүчеләр белән очрашуга әзер.

Казанга 20 фламинго китергәннәр – алар барысы да 2017 елда туган. Кошларның яшь булуы сәбәпле, аларның җенесен билгеләү мөмкин түгел, әлегә алар барысы да бер буйда һәм авырлыкта. Шуңа күрә зоопаркның яңа яшәүчеләренә исемнәр әлегә бирелмәгән. «Барысы да алар җенси җитлеккәнлеккә ирешкәч билгеле булачак. Биегрәк булганнары – ата, кечерәкләре – ана. Әлегә алар соры-ак төстә, алсу төссез диярлек, чөнки аларның каурыйлары үсмер. Фламингоның каурыйлары яше белән үзгәрә, соңрак алар алсу төскә керәчәк», – дип сөйләде зоопаркның экскурсия-массакүләм бүлеге зооинженеры Евгения Артамонова.

Аның сүзләренә караганда, кошларның төсенә аларның туклануы да йогынты ясый. Фламингоны махсус катнаш азык белән тукландыралар. Моннан тыш, аларның рационына туралган яшелчә, балык һәм ит фаршы керә. Үз ризыкларын каурыйлылар һәрвакыт җебетә, шуңа күрә аларның вольерлары территориясендә зур булмаган сулык бар.

Аларның яшәү шартлары җентекләп уйланылган. Зур булмаган бассейннан тыш, кошлар очып китмәсен һәм очраклы гына башка кошлар һәм хайваннар янына эләкмәсен өчен вольерда коймалар һәм электр киртәләре урнаштырылган. Фланминго янында нил казлары һәм мисыр тавыклары, шулай ук бегемот Захария яши. Фламингоның урам вольерыннан тыш эчке бүлмәсе да бар, анда алар төннәрне үткәрә һәм кыш көне яшәячәк.

Белгечләр билгеләп үткәнчә, хәзер фламинголар үзләрен шактый иркен тота һәм яңа шартларга күнегә башлаган. Алар рәхәтләнеп су коена һәм каурыйларын чистарта. Кошлар һәрвакыт көтү булып хәрәкәт итә, алар өчен зур гаилә булып яшәү мөһим. Тиздән Казан зоопаркында фламинголар тагын да күбрәк булачак – шәһәргә тагын 10 кош кертү планлаштырыла.

«Замбези елгасы»ның яңа яшәүчеләре инде бирегә килүчеләр тарафыннан яратылып өлгергән. Зоопарк хезмәткәрләре сүзләренә караганда, аларга игътибар бик күп. Кайбер казанлылар хәтта социаль челтәрләрдә аларны кайчан алып киләчәкләре белән кызыксынган, һәм зоопаркка фламинголарны күрү өчен генә килгән.

Зоопаркта киләсе тулылану көзгә якынрак булыр дип көтелә, дип хәбәр итте Е.Артамонова. Җәен күп кенә илләрдә эссе һава торышы аркасында хайваннарны күчерү тыела. Инде сентябрь-октябрь айларында Казан зоопаркына гориллалар, Судан ишәкләре һәм антилопалар урнашыр дип планлаштырыла.

Исегезгә төшерәбез, «Замбези елгасы» зоопаркының яңа территориясендә 50-гә якын хайван яши – бегемот, крокодил, гамадриллар, тәва кошлары, мисыр челәннәре, мартышка Бразза, сурикатлар, шимпанзе, ак арысланнар һәм башкалар.