Казан зооботаника бакчасында Полина атлы маймыл урнашкан

Яңа җәнлекне ТР башкаласына Волгоград өлкәсеннән алып килделәр

Фото: Казан зооботаника бакчасының матбугат хезмәте

(Казан шәһәре KZN.RU, 12 нче сентябрь). Казан зооботаника бакчасының тарихи өлешендә маймыл Полина урнашкан. Яңа җәнлеккә тугыз яшь, аны Волгоград хайваннарны яклау хәйрия фондыннан алып килгәннәр.

Полина юлны бик яхшы кичергән һәм үзен яхшы хис итә. Ул чи яшелчәләр, җиләк-җимешләр һәм су белән киң камерада күчерелгән. Маймыл әкренләп зоопарк хезмәткәрләренә ияләшә, кешеләрдән курыкмый һәм үз исеменә реакция белдерә. Учреждениедә Полинаның алма, банан, груша, апельсин һәм йөзем белән тукланырга яратуын билгеләп үтәләр. Хәзерге вакытта зоопаркның яңа вәкиле РФ ветеринария законнары таләпләренә туры китереп карантин уза.

Полина зоопаркның тарихи өлешендәге экзотариумда яши. Аны ике яшел мартышка – 23 яшьлек Семен һәм 21 яшьлек Соня янына урнаштырганнар. Башта зоопаркта яшәүчеләр бер-берсен чит күргән, әмма берничә минуттан дуслашканнар һәм күңелле итеп вольер буйлап сикерешә башлаганнар. Хәзер мартышкалар тату гаилә булып учреждениенең җәйге территориясендә йөриләр, дип хәбәр иттеләр Казан зооботаника бакчасының матбугат хезмәтендә.

Исегезгә төшерәбез, күптән түгел учреждениегә алты яшьлек Филимон исемле фил урнашкан иде. Аның Мәскәүдән күченүе ел ярымнан артык әзерләнгән. Яңа вәкил белән ТР башкаласы Мэры Илсур Метшин да танышты.

Шулай ук укыгыз

Барлык яңалыклар