Казан яшь тамашачылар театрында мөмкинлекләре чикле кешеләр өчен җайлаштырылган «Ибраһим әфәнде» һәм «Яшәртә торган алмалар» спектакльләрен тәкъдим итәчәкләр

Күрсәтүләр «Чикләрсез театр» проекты кысаларында узачак.

Фото: Денис Гордийко

(Казан шәһәре KZN.RU, 7-нче ноябрь). Ноябрьдә Казан яшь тамашачылар театрында мөмкинлекләре чикле кешеләр өчен җайлаштырылган «Ибраһим әфәнде» һәм «Яшәртә торган алмалар» спектакльләрен тәкъдим итәчәкләр. Күрү сәләте бозылган тамашачыларга тифлокомментатор колакчыннар аша сәхнәдәге хәлләрне тасвирлаячак, ә сурдотәрҗемәче начар ишетүчеләргә ишарәләр теле ярдәмендә спектакльне аңларга ярдәм итәчәк.

«Ибраһим әфәнде» спектакле 10-нчы ноябрьдә 18:30 сәгатьтә, «Яшәртә торган алмалар» 20-нче ноябрьдә 13:00 сәгатьтә узачак, дип хәбәр итә «Игелекле эшләр көне» фонды матбугат хезмәте.

Сәламәтлек мөмкинлекләре чикләнгән тамашачылар өчен ташламалы билетлар алу мәсьәләсе буенча театрга +7(987)211-37-47 телефоны буенча мөрәҗәгать итәргә кирәк.

Исегезгә төшерәбез, «Чикләрсез театр» проекты Яшь тамашачылар театры һәм «Игелекле эшләр көне» хәйрия фонды тарафыннан өченче ел гамәлгә ашырыла. Проект кысаларында тагын 4 спектакль җайлаштырылган: «Кыргый», «Кечкенә принц», «Оскар һәм Алсу төстәге әни» һәм «Джельсомино Ялганчылар Илендә».

Шулай ук укыгыз

Барлык яңалыклар