Казанның Балыкчы бакчасында теннис һәм баскетбол өчен мәйданчыклар төзелеше тәмамлана

Икенче чиратны төзекләндерү 55% ка башкарылган

Фото: Тышкы төзекләндерү комитеты

(Казан шәһәре KZN.RU, 13 нче июль). Казанда Балыкчы бакчасының икенче чиратын төзекләндерү буенча эшләр 55% ка башкарылган. Объектта 20 белгеч һәм 4 берәмлек техника эшли. Хәзер эшчеләр теннис һәм баскетбол мәйданчыгы төзелешен тәмамлыйлар. Шулай ук тышкы челтәрләр һәм сукмаклар нигезләре финишка җитеп килә.

Бакчада оригиналь яктылык бизәлеше – фонарьлар һәм ретростильдәге гирляндалар ясалачак. Тышкы яктырту инде 68% ка әзер. Паркта куркынычсызлык өчен видеокүзәтү һәм хәбәр итү системалары эшләячәк, аларны тоташтыру буенча эшләр яртылаш башкарылган.

Бакчаны төзекләндергәндә аерым игътибарны фонтанга бирәләр, ул киңлекнең үзәк элементына әвереләчәк. Эшчеләр фонтанның нигезен урнаштырдылар, ә киләсе атнада платформаны дүрт колонна тулыландырачак, алар өстенә яңадан ясалган касә һәм балыкчы скульптурасы куелачак.

Бакчада фонтан механизмнарын хезмәтләндерү өчен техник бина оештырылган, ә якын көннәрдә җиһазлар монтажлана башлаячак. Фонтанга су белән тәэмин итү челтәрләре алып килделәр һәм тиздән яктырту өчен электрны тоташтырачаклар. Су өчен савытның үзен керамогранит белән тышлыйлар. Фонтан 42% ка әзер, дип хәбәр иттеләр шәһәр Башкарма комитетының Тышкы төзекләндерү комитетында.

Исегезгә төшерәбез, Балыкчы бакчасының беренче өлешен узган елның сентябрендә ачтылар. Паркта Кызыл Армия урамы ягыннан эшчеләр яктырту һәм видеокүзәтү системаларын тоташтырдылар, юл япмасын яңарттылар һәм зур тематик балалар мәйданчыгы булдырдылар. Эш район халкы белән тыгыз элемтәдә алып барылды. Бакчаны су басуга карата халыктан килгән шикаятьләрне исәпкә алып, яшелләндерүгә зыян килмәслек итеп территориянең вертикаль планлаштырылуы үзгәртелде.

Балыкчы бакчасының икенче өлешендә спорт зонасы һәм чаралар үткәрү өчен мәйданчык барлыкка киләчәк – җәй көне анда фильмнар күрсәтеләчәк, ә кыш көне чыршы урнаштырылачак.

Шулай ук укыгыз

Барлык яңалыклар