Казанның Җиңү паркында гаскәрләрне Әфганстаннан чыгаруга 33 ел тулу хөрмәтенә чәчәкләр салдылар

Тантаналы чарада хәрби хәрәкәтләрнең ветераннары, иҗтимагый оешмалар вәкилләре, курсантлар һәм уку йортлары студентлары катнашты.

Фото: Балалар һәм яшьләр эшләре комитеты

(Казан шәһәре KZN.RU, 15 нче февраль). Бүген Казанның Җиңү паркында Әфганстаннан совет гаскәрләренең чикләнгән контингентын чыгаруга 33 ел тулуга багышланган тантаналы чара узды. Чарада Әфганстандагы хәрби хәрәкәтләрнең ветераннары, Казан һәм Татарстан иҗтимагый оешмалары вәкилләре, уку йортлары курсантлары һәм студентлар катнашты.

Рәсми затларның чыгышыннан һәм бер минутлык тынлыктан соң чарада катнашучылар сугышчы-интернационалистлар һәйкәленә чәчәкләр салды. Курсантлар ату коралыннан өч залп белән матәм салюты бирде.

Чара катнашучылары өчен Җиңү паркы территориясендә Казан югары танк командасы - Кызыл байрак училищесы тарафыннан хәрби-кыр кухнясы оештырылды, дип хәбәр иттеләр Балалар һәм яшьләр эшләре комитетында.

Чарада ТР Премьер-министры урынбасары Ләйлә Фазлыева, Казан гарнизоны башлыгы, Казан югары танк команда Кызыл байрак училищесы башлыгы, генерал-майор Кирилл Кулаков, Казан суворов хәрби училищесы башлыгы, генерал-майор Валерий Миронченко, ТР Министрлар Кабинетының Хәрби хәрәкәтләр ветераннары мәсьәләләре буенча координация советы әгъзалары һәм башкалар катнашты.

Исегезгә төшерәбез, 1989 елның 15 нче февралендә совет гаскәрләренең соңгы колоннасы Әфган-Совет чиген узды.

Тугыз еллык хәрби кампания вакытында Әфганстандагы хәрби хәрәкәтләрдә Казаннан 2 меңнән артык солдат һәм офицер катнашты. 275 казанлы «Батырлык өчен» һәм хәрби казанышлары өчен медальләре белән бүләкләнде, ә 93 геройга «Кызыл Йолдыз» ордены тапшырылды. Әфганстанда Казанның 34 кешесе һәлак булган, 108 кеше яраланган.

Шулай ук укыгыз

Барлык яңалыклар