Казанның «Крылья Советов» паркында бию мәйданчыгы эшли башлый

Дәресләр 10-нчы һәм 24-нче июльгә, 7-нче һәм 21-нче августка, шулай ук 4-нче сентябрьгә планлаштырылган.

(Казан шәһәре KZN.RU, 9-нчы июль). Иртәгә, 10-нчы июльдә, Казанның «Крылья Советов» паркында «Бию мәйданчыгы» дигән яңа проект эшли башлаячак. Биредә айга ике тапкыр чәршәмбе көннәрендә узган гасырның 40-80 еллары ритмы астында вальс, танго, рок-н-ролл, фокстрот һәм башка биюләр биергә мөмкин булачак.

Бию мәйданындагы дәресләр 10-нчы һәм 24-нче июльгә, 7-нче һәм 21-нче августка, шулай ук 4-нче сентябрьгә планлаштырылган. Дәресләр 19.00 сәгатьтә башлана. Оештыручылар дәресләр яхшы һава шартларында гына узачак, дип билгеләп үтә. Яңгыр һәм һава торышы начар булган очракта, алар булмый калырга яисә күчерелергә мөмкин. Шуңа күрә шәһәр халкына Парклар һәм скверлар дирекциясенең Instagram-аккаунттагы белдерүләрен күзәтергә киңәш итәләр.

Дәресләргә керү ирекле, алар төрле яшьтәге һәм төрле әзерлек дәрәҗәсе булган кешеләргә туры килә.

Шулай ук укыгыз

Барлык яңалыклар