Казанның «Калейдоскоп» паркында балалар өчен татар телендә зарядка үткәрәчәкләр

Чара программасында – флешмоб, фотосессия һәм истәлекле бүләкләр.

Фото: Тел культурасы өлкәсендә милли сәясәтне гамәлгә ашыру бүлеге

(Казан шәһәре KZN.RU, 17 нче август). Казанның «Калейдоскоп» паркында балалар өчен татар телендә зарядка узачак. «Хәрәкәттә – бәрәкәт» проектының чираттагы чарасы программасында – флешмоб, фотосессия һәм истәлекле бүләкләр.

Яшь казанлылар саф һавада күнегүләрне «Шаян ТВ» телеканалының әйдәп баручы җитәкчеләре белән бергә башкарачак. Моннан тыш, чара вакытында теләгән һәркем каналның төп персонажлары – Шаян һәм Мияу белән фотога төшә алачак.

Зарядка 19 нчы августта 17:00 сәгатьтә булачак, дип хәбәр иттеләр Казан Башкарма комитетының Телләр культурасы өлкәсендә милли сәясәтне гамәлгә ашыру бүлегендә.

Исегезгә төшерәбез, 18 нче августта 18:00 сәгатьтә «Чулпан» мәдәни-күңел ачу үзәге каршындагы мәйданда проектның тагын бер дәресе – «Батыр батл» татар биюе буенча мастер-класс узачак. Артистлар бию перформансын һәм ир-атлар биюен күрсәтәчәкләр. Теләге булган һәркем татар халык биюенең төп элементларын өйрәнеп кенә калмыйча, ә башка команда белән дә ярыша алачак.

«Хәрәкәттә – бәрәкәт» проекты чаралары Татарстан Республикасы Президенты каршындагы татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән Казан Мэриясе һәм шәһәрнең Парклар һәм скверлар дирекциясе тарафыннан гамәлгә ашырыла.

Исегезгә төшерәбез, «Хәрәкәттә – бәрәкәт» парклардагы җәйге иҗат һәм спорт дәресләренә 2021 нче елда, Туган телләр һәм халыклар бердәмлеге елында, старт бирелде. Узган ел барлыгы 14 мастер-класс үтте. Быел проект дәвамында әлегә «Ярмәк вагы» татар биюе, чечетка, бию аэробикасы, брейк-данс һәм татар халык биюе, «Зәлидә» җырлы-биюле уены буенча барлыгы 6 мастер-класс оештырылды. Чаралар сентябрьгә кадәр үткәреләчәк.

Шулай ук укыгыз

Барлык яңалыклар