Казан зооботаника бакчасына Красноярсктан зебра алып кайтканнар

Язга кадәр ул ябык вольерда яшәячәк.

Фото: Марат Мугинов

(Казан шәһәре KZN.RU, 27-нче октябрь). Казан зооботаника бакчасында Вика кушаматлы зебра пәйда булды Ул Красноярск зоопаркыннан кайткан һәм хәзерге вакытта карантинда. Хайван җылы ябык вольерда кышлаячак һәм зооботаника бакчасына килүчеләр янына яз көне генә чыгачак.

Казан зооботаника бакчасының яңа кунагы Чапман зебрасы төренә, бурчеллова (саванна) төрчәсенә керә һәм, нигездә, үлән, кайвакыт куаклар белән туклана.

Зебра Викага 8 ай. Аны карый торган Казан зооботаника бакчасы белгечләре хайванның контактка бик теләп керүен, кешеләр белән кызыксынып аралашуын һәм ризыкны кулдан алуын билгеләп үтә. Яз көне ул «Замбези елгасы» комплексы территориясендә саванна зонасында яшәячәк һәм башка зебралар, шулай ук антилопалар, марабу һәм тәва кошлары белән бергә йөриячәк.

Якын арада зооботаника бакчасының иске өлешеннән яңа, африка өлешенә икенче – Ремик кушаматлы ата зебра күченәчәк. Виканың җенси җитлегү чорына кадәр ул күрше вольерда яшәячәк, һәм хайваннар киртә аша аралашачак.

Казан зооботаника бакчасының планнарында – тагын ике зебра алып кайту, дип билгеләп үтелә учреждениенең Instagram битендә.

Быел шулай ук «Замбези елгасы»ның яңа комплексына Сүрия һәм Иорданиядән фламинголар кайтты, ә лемур һәм даманнар гаиләсендә балалар барлыкка килде. Территориядә барлыгы 50-гә якын хайван яши: су үгезе, крокодил, гамадриллар, страуслар, Мисыр челәннәре, мартышка Бразз, сурикатлар, шимпанзе, ак арысланнар һәм башкалар.

Шулай ук укыгыз

Барлык яңалыклар