Казанда хәйрия тегү остаханәсе эшли башлаячак

Ул Мәскәү изгеләре һәм могҗиза күрсәтүчеләр гыйбадәтханәсе территориясендә урнашачак.

Фото: tatmitropolia.ru

(Казан шәһәре KZN.RU, 18 нче гыйнвар). Казанда Мәскәү изгеләре һәм могҗиза күрсәтүчеләр храмы территориясендә хәйрия тегү остаханәсе ачылачак.

Остаханәдә кул эшенә төрле яшьтәге хатын-кызлар өйрәнә алачак. Дәресләрдә алар корама юрган, урын-җир, урындык япкычлары, сарафан, итәкләр, халатлар тегәчәкләр, сувенир эшләнмәләр ясаячаклар.

«Эшләнмәләрнең бер өлешен без мохтаҗ гаиләләрдән булган балаларга тапшырачакбыз, ә бер өлешен хәйрия ярминкәсендә сатарга ниятлибез. Алынган акчалар проектта катнашкан мастерларга хезмәт хакына һәм хезмәтебез карамагындагыларга, авыр тормыш хәлендә калган кешеләргә ярдәмгә тотылачак», – дип шәрехләде «Мәрхәмәт – Казан» мохтаҗларга ярдәм итү хезмәте җитәкчесе Ольга Варганова.

Хәзер иҗади остаханә ачылачак биналарда тегү һәм чигү машиналары, оверлок, пар генераторы һәм грант акчаларына сатып алынган башка җиһазлар урнаштырыла, дип хәбәр ителә Татарстан митрополиясе сайтында.

Остаханәдә беренче дәрес – 24 нче гыйнварда 18:00 сәгатьтә, икенчесе 26 нчы гыйнварда 13:00 сәгатьтә Мәскәү ур., 39 адресы буенча узачак. Дәресләр бушлай булачак, төркемгә +7(912)245-60-36 телефоны буенча язылырга мөмкин.

Остаханәне ачу Казан епархиясенең «Мәрхәмәт – Казан» мохтаҗларга ярдәм итү хезмәтенең гражданнар җәмгыятен үстерүгә ТР грантларын бирү конкурсында җиңүе аркасында мөмкин булган.

Шулай ук укыгыз

Барлык яңалыклар