Казанда туристик портал эшләтеп җибәрделәр

Цифрлы ресурс кунакханәләрне броньларга, туристик маршрутлар төзергә мөмкинлек бирә

Казанда яңа туристик портал эшли башлады. Цифрлы гид Татарстан башкаласы кунаклары өчен сәфәрләрне планлаштыруны гадиләштерергә, аларга шәһәрдә ориентлашырга, булган вакыйгалар турында белергә, отельләр, истәлекле урыннар һәм маршрутлар сайларга ярдәм итәргә тиеш. Бу хакта бүген шәһәр башкарма комитетында эшлекле дүшәмбедә Казан туризмын үстерү комитеты директоры Дарья Санникова сөйләде.

2025 елның беренче яртыеллыгында Казанга 2,3 млн кеше килде, бу узган ел күрсәткечләренә туры килә. Туристларга уңайлы булсын өчен, ТР башкаласында туристик портал go.kzn.ru эшли башлады.

Аны шәһәр трансформациясе үзәге һәм Мәгълүмати технологияләр һәм элемтә идарәсенең актив катнашында бер елга якын эшләделәр. Проект командасы Россия шәһәрләрендә һәм чит илләрдә шундый ук карарларга масштаблы анализ ясады, бу дөньядагы иң яхшы тәҗрибәләрне интеграцияләргә һәм аларны Казан туристлары ихтыяҗына җайлаштырырга мөмкинлек бирде, дип хәбәр итте Дарья Санникова.

Go.kzn.ru порталы туристларга урнаштыру чараларының тулы исемлеген, экскурсияләр һәм чаралар турында мәгълүматны, истәлекле урыннар, музейлар, театрлар, рестораннар һәм парклар каталогын бирә.

«Казан турында» бүлегендә яңалыклар, тематик мәкаләләр һәм шәһәр вакыйгалары бастырылачак – концертлар, күргәзмәләр, спорт чаралары һәм башкалар. Шунда ук туган якны өйрәнүче Анатолий Елдашевның язмалары белән танышырга мөмкин булачак.

Порталга тематик маршрутлар җыелган. Һәр маршрут объектларны җентекләп тасвирлап кына калмый, ә аларны Яндекста визуализацияләүне дә күздә тота. Мәсәлән, «Казан татар язучылары язмышында» дигән бер көнлек маршрутны карарга мөмкин. Формалаштырылган маршрутны саклап калырга һәм бастырып чыгарырга мөмкин. Моннан тыш, шәхси кабинетта үз юл йөртүчесен формалаштыру функциясе уйланылган: сайттан файдаланучылар ошаган объектларны саклый алалар, һәм үз сайлавы нигезендә маршрутның шәхси картасы төзелә.

Чит ил кунакларына уңайлы булсын өчен, өч телдә – рус, татар һәм инглиз телләрендә туристлык белешмәлеге бүлеге каралган.

Портал даими рәвештә тулыланачак һәм актуальләштереләчәк, дип билгеләде Дарья Санникова. Туризмны үстерү комитеты Казанның барлык кызыксынган оешмаларын һәм туристлык инфраструктурасы объектларын – урнаштыру чараларын, күрсәтү объектларын, җәмәгать туклануы предприятиеләрен, чараларны оештыручыларны, экскурсия бюроларын һәм гидларны – үзе турында яисә вакыйгалар турында порталда бушлай мәгълүмат урнаштыруга чакыра. Объект яки хезмәт күрсәтү турында мәгълүматны сайтның аскы блогында урнашкан махсус Яндекс-форма ярдәмендә өстәргә мөмкин.

«Яңа туристик портал Казанның туристлык потенциалын нәтиҗәле алга җибәрү өчен үзәкләштерелгән платформа булырга тиеш. Без кызыксынган барлык якларны да Казанны бөтен дөньядан кунаклар өчен тагын да җәлеп итүчән итү өчен аның тулылыгында актив катнашырга чакырабыз!» – дип йомгаклады Дарья Санникова.