Узган атнада Казанның агынты сулар челтәрендә 430 дан артык чүп тыгылу очрагы җайга салынган

«Водоканал» хезмәткәрләре суүткәргеч челтәрләрдә торба тишелеп 49 су агу очрагын ачыклаган

Марат Мөгыйнов фотосы

Узган атнада Казанда «Водоканал» муниципаль унитар предприятиесе хезмәткәрләре суүткәргеч челтәрләрдә торба тишелеп 49 су агу очрагын һәм агынты сулар челтәрендә 431 чүп тыгылу очрагын җайга салган. 31 объектта эшләр суны туктатмыйча башкарылган.

Моннан тыш, шушы вакытта предприятие эшчеләре Универсиада авылы тирәсендә агынты сулар челтәрендәге авария очрагын оператив рәвештә җайга салган. Биредә канализация линиясен гидродинамик ысул белән юдыртканнар.

«Водоканал» муниципаль унитар предприятиесе канализациягә чит әйберләр ташлау тыелуын һәм моның торак фондыннан файдалануның гамәлдәге кагыйдәләрен бозуын искәртә. Агынты сулар челтәре бары тик көнкүреш агынтылары өчен генә кулланылырга тиеш, азык калдыклары, хайваннарның бәдрәфе өчен каралган тутыргычлар һәм башка предметлар авария очрагы тудыра.

Тышкы челтәрләрдә чүп тыгылган очракта шәһәр халкы бу хакта Водоканалның социаль челтәрләренә яки авария-диспетчерлык хезмәтенең +7(843)231-62-60 телефон номеры буенча җиткерә ала. Мөрәҗәгатьләрнең барысы да чират тәртибендә карала.

Исегезгә төшерәбез, Татарстан Республикасы башкаласында инженерлык челтәрләре 70 процентка тузган дип санала. 2025 елда инженерлык челтәрләрен һәм алар белән бәйле объектларны яңартуга 6 миллиард сумнан артык акча тотылган. Әлеге сумманың 1,5 миллиард сумы коммуналь инфраструктураны яңарту белән бәйле республика программасы буенча, 4,5 миллиард сумы ресурслар белән тәэмин итүче оешмаларның кертем программалары хисабына бүлеп бирелгән.

Шулай ук укыгыз

Барлык яңалыклар