Казанда бер атна эчендә кискен респиратор-вирус инфекцияләре белән авыруның 10 меңнән артык очрагы теркәлгән

Авыручылар саны эпидемия бусагасыннан 7,8%-ка югары.

(Казан шәһәре KZN.RU, 26-нчы февраль). Атна дәвамында Казанда кискен респиратор вирус инфекцияләре белән авыруның 10 мең 732 очрагы теркәлгән, бу күрсәткеч 10 мең кешегә 85,3 тәшкил иткән. ТР башкаласында авыручылар саны эпидемик бусагадан 7,8%-ка югарырак. Мәктәпкәчә яшьтәге балалар арасында авыручылар саны эпидемия бусагасыннан түбәнрәк, мәктәп укучылары һәм өлкәннәр арасында - югарырак.

Тулаем алганда, Татарстан буенча атна эчендә кискен респиратор вирус инфекцияләре белән авыруның 23 мең 443 очрагы теркәлгән, бу күрсәткеч 10 мең кешегә 61,0 тәшкил иткән. Кискен респиратор вирус инфекцияләре белән авыручылар саны эпидемия бусагасыннан 2,9%-ка югары. Авыручылар саны өлкәннәр арасында эпидемия бусагасыннан югары, дип хәбәр итә Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе матбугат хезмәте.

Шәһәрлеләргә йогышлы авыруларга каршы профилактика чараларын үтәргә һәм салкын тию яки грипп симптомнары булганда кичекмәстән табибка мөрәҗәгать итәргә киңәш итәләр.

Шулай ук укыгыз

Барлык яңалыклар