Казанда мошенникларның кол-үзәген ачыклаганнар – 17 җинаятьче тоткарланган

Җинаятьчеләр төркемен табарга ясалма интеллект ярдәм иткән

Фото: Денис Гордийко

(Казан шәһәре KZN.RU, 19 нчы сентябрь). Россиянең эре банкларының берсенең хезмәткәрләре ясалма интеллект ярдәмендә Казаннан эшләгән мошенникларның кол-үзәген ачыклаганнар. Полиция җинаять төркеменең 17 катнашучысын тоткарлаган.

Мошенниклар илнең төрле төбәкләренә шалтыраткан һәм үзләрен ведомство предприятиеләре хезмәткәрләре дип таныштырганнар. Шуннан соң зыян күрүчеләрнең фатирлары адреслары буенча аферистлар ялган белгечләр җибәрә, алар янгын куркынычсызлыгының мәҗбүри чаралары буларак газ һәм электр җиһазларын «ремонтлаганнар», зур бәя буенча пластик тәрәзәләрне алыштырганнар. Җинаятьчеләр өлкән яшьтәге кешеләрне алдалый һәм алардан акча урлый.

Эшне тикшерүне Санкт-Петербург һәм Ленинград өлкәсе полиция хезмәткәрләре алып барган, аларга банк белгечләре дә кушылган. Ясалма интеллект технологияләре ярдәмендә шикләнелүчеләр даирәсен киметә алганнар, бу тикшерү эшен тизләтергә мөмкинлек биргән.

Хәзерге вакытта РФ Җинаять кодексының 159 нчы маддәсендә каралган («Мошенниклык») билгеләре буенча 17 җинаять эше кузгатылган. Банк полициягә тикшерүдә ярдәм итә, дип хәбәр иттеләр кредит оешмасының матбугат хезмәтендә.

Шулай ук укыгыз

Барлык яңалыклар