Казанда иң көчле тренерларны һәм торак комплекста иң спортлы ишегалдын сайладылар

Татарстан Республикасы башкаласында 24 номинация буенча ел саен бирелә торган «Спортлы Казан» премиясен тапшырдылар.

Фото: Казан шәһәре KZN.RU

(Казан шәһәре KZN.RU, 20-нче декабрь, Ксения Швецова). Узган атнада Татарстан башкаласында елның спорт нәтиҗәләренә йомгак ясалды. «Спортлы Казан» еллык премиясен тапшыру тантанасында 24 номинация буенча иң яхшы спортчылар, тренерлар, федерацияләр, физик культура һәм спорт учреждениеләре хезмәткәрләре, шулай ук тармак үсешенә зур өлеш керткән кешеләр бүләкләнде. Бүген эшлекле дүшәмбедә Физик культура һәм спорт комитеты рәисе Альберт Салихов Татарстан башкаласының спорт тормышына йомгаклар турында тулырак итеп сөйләде.

Спорт эшләренә йомгак ясау һәм бүләкләү тантанасы Сәет Галиев исемендәге мәдәният йортында узды. Конкурска барлыгы 60-тан артык гариза килгән. Һәр номинациядә җиңүчеләрне Казанның Физкультура һәм спорт комитетының профильле оешмалар белән берлектә эксперт комиссиясе сайлады.

Россия спорт мастеры Дарья Глухих муниципаль спорт мәктәбенең иң яхшы балалар тренеры булды. Ул «Грация» спорт мәктәбендә нәфис гимнастика буенча дәресләр алып бара.

Иң яхшы физик культура укытучысы дип Мәскәү районының 75-нче номерлы гимназиясе укытучысы Игорь Чебуков танылды. «Ел ачышы» номинациясендә хип-хоп Shadows буенча команда тренеры Дарья Шарова җиңде. «Дарьяның тәрбияләнүчеләре күптән түгел Парижда узган фитнес-аэробика буенча дөнья чемпионатының триумфаторлары булды һәм турнирдан ике алтын һәм бер бронза медаль алып кайтты», – дип ассызыклады А.Салихов.

«Олимпия спорт төрләре буенча ел спортчысы» номинациясендә академик ишкәкләү буенча Россия спорт мастеры, дөнья беренчелегенең бронза призеры – 2021, бу ел Россия чемпионатының көмеш медале иясе Александра Фомина җиңү яулады.

Спортның олимпия төрләре буенча иң яхшы тренерлар – Александраның остазлары – Спортның ишкәк ишү төрләре үзәге базасында спортчыларны әзерләүче Спортның ишкәк ишү төрләре буенча мәктәп тренерлары Елена һәм Павел Гараниннар.

«Динамо» спорт мәктәбендә тәрбияләнүчеләр елның иң яхшы командасы дип табылды – 2008 елда туган балалар Идел буе федераль округы беренчелеге чемпионнары, шулай ук «Владислав Третьяк кубогы» Бөтенроссия ярышларының бронза призерлары булдылар.

Быел өстәмә рәвештә яңа номинацияләр дә кертелде. Мәсәлән, йөзү буенча тренер, сәламәтлек мөмкинлекләре чикләнгән балалар остазы Ксения Лактионова адаптив физик культура буенча иң яхшы инструктор дип танылды. Ә.Салихов сүзләренә караганда, аның күп кенә шәкертләре спорт ярышларында катнаша һәм призлы урыннар яулый.

Эксперт комиссиясе фикеренчә, иң яхшы спорт студентлар клубы Казан федераль университетында, ә иң спортлы ишегалды «Весна» торак комплексында урнашкан. Анда яшәүчеләр шәһәрнең торак комплекслары Спартакиадасы җиңүчеләре булып тора.