Казанда инвалидлар өчен парковка урыннарын биләүче машина йөртүчеләрне яңа программа ярдәмендә ачыклаячаклар

Киләсе елда 30дан артык автомобиль «Тукталыш тыелган» билгесен бозучыларны билгели торган система белән җиһазландырылачак

Казанда инвалидлар өчен парковка урыннары башка машина йөртүчеләре белән кулланылмасын өчен махсус программа тәэминаты эшләнелә. Кагыйдә бозган өчен программада теркәлгән транспорт чарасы турында мәгълүматлар ЮХИДИга административ штраф түләү өчен тапшырылачак, ул 5 мең сум тәшкил итә. Бу хакта эшлекле дүшәмбедә Башкарма комитеты җитәкчесе урынбасары Илдар Шакиров хәбәр итте.

Ул федераль закон буенча инвалидлар өчен урыннар гомуми машина урыннарының 10% ын тәшкил итәргә тиешлеген искәртте. Бүгенге көндә Казанда 865 урын әзерләнгән. Инвалид автомобилен урнаштырган өчен түләү алынмый. Әмма сәламәтлек мөмкинлекләре чикләнгән кешеләр үзләре өчен махсус билгеләнгән буш урыннарны таба алмыйлар һәм гомуми файдаланудагы урыннарда машинаны түләүсез калдыралар. Бу штрафка китерә.

«Әгәр инвалид беренче тапкыр мондый хокук бозуга юл куйса, җәзаны йомшарту максатында административ штраф урынына телдән кисәтү ясала», – дип билгеләде Илдар Шакиров. Мәсәлән, быел биш ай эчендә 2420 телдән кисәтү чыгарылган.
Моннан тыш, шәһәрдә башка программаларны булдыру һәм камилләштерү буенча да эш алып барыла. Мәсәлән, «Паркон» автомат рәвештә эшли торган җайланма «Тукталыш тыелган» дигән юл билгесе куелган җирләрдә кагыйдәләрен үтәмәгән машина йөртүчеләрне күзәтә. Кушымта «Шәһәр парковкасын оештыручы» МКУ автомобиленә урнаштырыла һәм хокук бозучының дәүләт номеры аша транспорт чарасының фотосын һәм видеосын терки. Мәгълүматлар административ материал төзү өчен ЮХИДИга тапшырыла. Быел 350 машина йөртүчене җаваплылыкка тартканнар.

«Уңай тәҗрибәне исәпкә алып, без агымдагы елда тагын ике шундый комплекс сатып алырга, ә 2025 елда муниципаль парковкаларга түләүне тикшерүче барлык автомобильләрне (алар 30 дан артык булачак) җиһазландырырга планлаштырабыз», – дип сөйләде Илдар Шакиров.

Фотосурәтләрне эшкәртү программасы яңартылды, ул фото- һәм видеотеркәү комплексларыннан килгән мәгълүматларны теркәгәндә хаталарны киметергә мөмкинлек бирәчәк.

Машина кую урынының кайнар линиясенә роботлаштырылган тавыш ярдәмчесе кертелгән, ул кулланучыларга кызыксындырган сорауларга тизрәк җавап алырга ярдәм итә, шул исәптән эш режимы, түләү ысуллары, ташламалар, штрафлар турында мәгълүматны тапшыра.

«Горпарковка» кушымтасы һәм сайт кулланучылары хәзер көн ахырына кадәр автомобильнең күрсәтелгән дәүләт номерын яки машина кую урынының номерын төзәтә, парковка вакытының тәмамланганын күзәтә алалар. Эшнең беренче ике аенда аның белән 1000нән артык кулланучы файдаланган, бу штрафларга юлыкмаска мөмкинлек биргән.