Казанда яңгыр сулары канализациясе челтәрләрен чистарту көчәйтелгән режимда алып барыла

Әмирхан, Миль, Чуйков, Мәүлүтев, Еники, Девятаев урамнарында, Ферма шоссесында су басулар бетерелгән

Фото: тышкы төзекләндерү комитеты

Казанда яңгыр сулары канализациясе челтәрләрен чистарту көчәйтелгән режимда алып барыла – төнлә шәһәрдә 10 мм явым-төшем яуган, ә март аенда айлык норма – 38 мм. Подрядчы оешма эшчеләре су басу куркынычы аеруча зур булган урыннарга чыкканнар. Алар, яңгыр һәм эрегән кар сулары тоткарлыксыз китсен өчен, коеларны чистарталар.

27 нче март иртәсенә Миль, Чуйков, Мәүлүтев, Еники, Девятаев урамнарында, Ферма шоссесында челтәрләр чистартылган һәм су басулар бетерелгән. Эш дәвам итә, дип хәбәр иттеләр Казанның тышкы төзекләндерү комитетында.

Казанлылар су баскан участоклар турында мәгълүматны «Шәһәрне төзекләндерү» МУПнең диспетчерлык хезмәтенә +7(843)555-07-96 телефоны буенча калдыра ала. Тышкы төзекләндерү комитеты проблемалы урыннар турындагы мөрәҗәгатьләрне шулай ук оператив рәвештә предприятие белгечләренә тапшыра.

Шәһәр поселокларында су басу очраклары турында район администрацияләренә хәбәр итәргә кирәк, шулай ук мөрәҗәгатьләрне бердәм дежур-диспетчерлык хезмәте дә кабул итә. Телефоннар сылтама буенча күрсәтелгән.

Кичә Татарстан Гидрометеоүзәге һава торышының начарлануы турында кисәтте. Метеорологлар фаразлавынча, 26-28 нче март көннәрендә явым төшем айлык норманың 30-50% ы күләмендә явачак, ә кайбер районнарда – 100% һәм аннан да күбрәк. Бүген республикада тәүлегенә 15-30 мм күләмендә явым-төшем көтелә. Яңгыр, юеш кар һәм буран вакытында күз күреме 500-1000 метрга кадәр начарланырга мөмкин. Төньяктан исүче җилнең тизлеге секундына 18-23 метрга җитәчәк. Юлларда – көчле бозлавык һәм кар.

Шулай ук укыгыз

Барлык яңалыклар