Казанда үзизоляция чорында чыгарылган калдыклар саны 20%-ка арткан

Казанлылар суны һәм электр энергиясен 5-10%-ка күбрәк тота башлаган.

(Казан шәһәре KZN.RU, 6-нчы апрель, Алсу Сафина). Үзизоляция чорында казанлылар суны һәм электр энергиясен 5-10%-ка күбрәк тота башлаган. Чыгарыла торган калдыклар саны, гадәттәге көннәр белән чагыштырганда, якынча 20%-ка арткан, шул ук вакытта үсеш торак массивларда күзәтелгән, бу чорда анда күп кенә шәһәр халкы күченгән. Бүген Казан башкарма комитеты җитәкчесе урынбасары Искәндәр Гыйниятуллин коронавирус инфекциясе таралуга каршы тору буенча шәһәр штабы утырышында шундый мәгълүматлар җиткерде.

Ул лифтларның йөкләнеше 50%-тан артыкка кимеде, дип җиткерде. «Бу шәһәр халкының хәрәкәт итүенең кимүен күрсәтә», - дип билгеләп үтте И.Гыйниятуллин. Моннан тыш, җылылык энергиясен куллану 10%-ка кимегән. Бу көнлек уртача температураның 4-5 градуска кадәр күтәрелүе белән бәйле.

Казан Мэры Илсур Метшин фатирлардагы температура режимына аерым игътибар бирергә чакырды. «Фатирларны кирәгеннән артык җылыту турында берничә мөрәҗәгать булды, - диде шәһәр башлыгы. - Дөрес, бүгенге һава торышы җылылык сүндермәүнең дөрес карар булуы турында сөйли. Температура +13 белән -1-2 арасында тирбәләчәк. Фатирлардагы шартларның уңайлы булуы мөһим».