Казанда якшәмбегә каршы төндә ТЭЦ урамында хәрәкәт туктатыла

Чикләү кертелгән вакытта 29 нчы һәм 62 нче автобусларның хәрәкәт схемасы үзгәрә

Денис Гордийко фотосы

Казанның ТЭЦ урамында Икмәк заводы урамыннан Гудованцев урамына кадәрге юл өлешендә транспорт хәрәкәте вакытлыча туктатыла. Чикләү 13 декабрь көнне 20:00 сәгатьтән 14 декабрь 08:00 сәгатькә кадәр кертелә. Әлеге күренеш «Казан җылылык челтәрләре»нең җылылык белән тәэмин итү челтәрендә башкарыла торган эшләргә бәйле.

Шул сәбәптән, 29 нчы һәм 62 нче номерлы автобусларның хәрәкәт схемасы үзгәрәчәк. Гудованцев урамы юнәлешендә алар ТЭЦ урамы – Челюскин урамы – Беломорск урамы буенча барачаклар һәм алга таба хәрәкәт маршрут буенча дәвам итәчәк. Кире юнәлештә автобус – Беломорск урамы – Челюскин урамы – Максимов урамы – Ленинград урамы – Копылов урамы буенча хәрәкәт итәчәк.

«Белинский урамы», «Тепличный» совхозы», «Икмәк заводы», «Вертолет заводы», «Водоканал» һәм «ТЭЦ урамы» тукталышлары вакытлыча булмаячак.

Вертолет заводы хезмәткәрләре һәм теләге булган шәһәр халкы өчен «Гудованцев урамы – Вертолет заводы» һәм «Авиатөзелеш» метро станциясе – Икмәк заводы урамы» юнәлешендә ике шаттл хәрәкәтен оештыралар.