Казанда Жилплощадкада быел ике футбол манежы, ачык физкультура-сәламәтләндерү комплексы һәм бассейн төзеләчәк

Барлык спорт корылмалары да халык өчен ачык булырга тиеш, дип билгеләп үтте Татарстан Президенты.

(Казан шәһәре KZN.RU, 28-нче февраль, Ксения Швецова). Быел Казанда ике футбол манежы һәм ачык типтагы физкультура-сәламәтләндерү комплексы төзү планлаштырыла. Шәһәрдә барлыгы 2 меңнән артык спорт корылмасы бар. Алар барысы да халык өчен ачык булырга тиеш, дип билгеләп үтте Татарстан Президенты Рөстәм Миңнеханов Ратушада узган Казан шәһәре Думасының XXXVIII сессиясе утырышында.

Быел республика башкаласының Авиатөзелеш районындагы Жилплощадка территориясендә 2 футбол манежы, ачык типтагы физкультура-сәламәтләндерү комплексы, 8 универсаль спорт мәйданы һәм бассейн төзү планлаштырыла, дип хәбәр итте утырышта Казан Мэры Илсур Метшин. Исегезгә төшерәбез, Танк һәм Чуйков урамнары буенча урнашкан түбәсе ябулы ике футбол манежы төзелешенә старт декабрьдә бирелде.

2005-2019 елларда Казанда барлыгы 709 спорт корылмасы төзелгән, шул исәптән 108 универсаль спорт мәйданчыгы. «Спорт объектлары белән тәэмин ителеш 40,5% тәшкил итә», – дип өстәде шәһәр башлыгы.

«Казанда бүген 2078 спорт корылмасы, берничә эре объект төзү планлаштырыла. Алар барысы да халык, үсеп килүче буын файдасына эшләргә тиеш», - диде Татарстан Президенты Рөстәм Миңнеханов.

Соңгы елларда даими рәвештә спорт белән шөгыльләнүче шәһәрлеләр саны шактый артты, дип өстәде Мэр. «Без 2010 елда «Сәламәтлек бишьеллыгы» программасын башлап җибәргәндә, шәһәрдә даими рәвештә физкультура һәм спорт белән шөгыльләнүчеләр 18,7% булды, - дип искә төшерде ул. - Бүген бу күрсәткеч өч тапкырга диярлек артты һәм 49,54% тәшкил итә».