Бу ялларда Казанда йорт хайваннарына бушлай вакцина ясау чаралары дәвам итә

Процедура Идел буе һәм Совет районнарында үткәрелә

Денис Гордийко фотосы

Бу ялларда Татарстан башкаласында эт һәм мәчеләргә бушлай вакцина ясау чаралары дәвам итә. Ветеринария хезмәткәрләре Идел буе һәм Совет районнарында урнашкан торак массивларда эшләячәк. Шул ук вакытта хайваннарга чип кую эше дә башкарыла.

Шимбә көнне, 28 мартта, 10:00 сәгатьтән 12:00 сәгатькә кадәр Иске горки торак массивында (Артель урамы, 10) хайваннарга котыру авыруына каршы прививка ясала. Әлеге төр вакцина Борисково торак массивында (Якты Юл тыкрыгы, 4) 12:30–14:30 вакыт аралыгына, «Абу Даби» коттедж бистәсендә Тылсым урамы, 20 йорт адресы буенча урнашкан кибет янында 10:00–14:00 вакыт аралыгына билгеләнгән.

Якшәмбе, 29 мартта, ветеринария хезмәткәрләре 10:00 сәгатьтән 13:00 сәгатькә кадәр Беренче май торак массивында (2 нче Хәрби шәһәрчек урамы, 142/1) булачак. Чебакса торак массивында яшәүче халык хайваннарны прививка ясатырга 10:00–14:00 вакыт аралыгында Завод урамындагы «Чебакса торак массивы» тукталышы янына алып килә ала.

Тулырак мәгълүмат алу өчен Казанның дәүләт ветеринария берләшмәсенә +7(843)295-08-49 телефон номеры аша мөрәҗәгать итәргә була.

Алдарак узган ялларда 225 эт һәм мәчегә прививка ясаулары хакында хәбәр ителгән иде. 16 эткә чип куелган.