Казанда реклама конструкцияләре урынын алу өчен материалларны әзерләү вакыты 5 мәртәбә кимеде

Хәзер аны урнаштыруга рөхсәт алу өчен фирма гариза гына бирә, ә нәтиҗә дәүләт хезмәтләре порталында шәхси кабинетка килә.

Фото: Денис Гордийко

(Казан шәһәре KZN.RU, 6 нчы февраль, Юлия Летникова). Казанда реклама конструкцияләре урынын алу өчен материаллар әзерләү вакыты 5 тапкырга, шулай ук аларны урнаштыруга рөхсәт бирү вакыты өчтән бер өлешкә кимеде. Муниципаль хезмәтләрне цифрлаштыру эше турында аппарат киңәшмәсендә Тышкы реклама һәм мәгълүмат идарәсе башлыгы Әскәр Баһаутдинов сөйләде.

«Баштан ук, муниципаль хезмәтләрне электрон форматка күчерү белән шөгыльләнә башлагач, бу модага иярү түгел, ә мөһим бурыч – заманага яраклашу кирәклеге турында сөйләделәр. Нәтиҗәләр үзләрен көтәргә мәҗбүр итмәде: элек документларны рәсмиләштерү 9 ай барса, хәзер бөтен процесс башыннан ахырына кадәр ай ярым дәвам итә», – дип билгеләде шәһәр Мэры Илсур Метшин.

2022 елда белгечләр шулай ук реклама конструкциясен урнаштыруга рөхсәт бирү процессын оптимальләштерделәр. Нәтиҗәдә, хезмәт күрсәтү вакыты 33% ка – 12 дән 8 эш көненә кадәр кимегән. Рөхсәт алу өчен кирәкле документлар саны да кимеде: хәзер фирма гариза гына бирә, ә проект материалларын хезмәт күрсәтүче белгечләр әзерли.

Ә.Баһаутдинов реклама конструкциясен урнаштыруга рөхсәт бирү буенча хезмәтнең тулысынча цифрда күрсәтелүен искәртте. Нәтиҗә муниципаль хезмәтләр порталының шәхси кабинетында яки фирманың электрон почтасына килә, шуңа күрә мөрәҗәгать итүченең идарә белгечләре белән элемтәсе бетерелде. Әгәр компаниянең порталда теркәлүе булмаса, гаризаны КФҮ бүлегендә бирергә мөмкин.

Хәзер идарәнең төп операцион эше геомәгълүмат системасына – КМГИСка күчерелде. Платформага реклама конструкцияләрен вакытлыча сүтү һәм аларны кабул итү, килешүләрнең үтәлешен контрольдә тоту турында мәгълүмат өстәлде, торглар үткәрүгә заявкалар өчен урыннарның электрон картасы һәм башка мәгълүматлар кертелә.