Казанда транспорт чараларын яшел зонада калдырып китүчеләр буенча контрольне көчәйтү өчен экипажлар саны артачак

Бер ел эчендә шундый 19,5 мең хокук бозу очрагы теркәлгән

Денис Гордийко фотосы

Административ-техник инспекция идарәсе транспорт чараларын яшел зонага куюны контрольдә тотуны көчәйтергә ниятли. Ел башыннан махсус техник чаралар ярдәмендә шундый 19,5 мең очрак теркәлгән. Бу узган елның шул ук чоры белән чагыштырганда 22 процентка артыграк күрсәткеч. Бу хакта бүген эшлекле дүшәмбедә Башкарма комитетның Административ-техник инспекциясе идарәсе башлыгы Артур Мөхәммәтшин җиткерде.

Контрольнең нәтиҗәлелеген арттыру максатыннан Административ-техник инспекция идарәсенең ике экипажына, искергән җиһазларны алыштырып, яңа «Дозор-М3» фото- һәм видеотеркәү комплекслары куелган. Яңа җайланмалар ярдәмендә тикшерү тизлеге арткан һәм аның материалларны сыйфатлырак итү мөмкинлеге зур, ди белгечләр. Хәзер сурәтләрдә автомобиль тәгәрмәчләре астындагы җир өслеге ачык күренә икән. Ә бу исә судта теркәлгән хокук бозуларны дәгъвалау ихтималын шактый киметә.

Яңартылган техника саны артуга карамастан, шәһәрнең бөтен территориясен тулысынча колачлау өчен гамәлдәге экипажлар гына җитәрлек түгел, дип саный җитәкче. «Гамәлдәге экипажлар шәһәрнең бөтен территориясен әйләнеп чыгарга өлгерми. Тыгыз автомобиль трафигы, ишегаллары тулы транспорт чаралары – болар бар да безнең эшнең тизлеген киметә. Дәрвишләр, Юдино кебек территорияләр, урман-парк зоналары өстәмә ресурслар таләп итә», - дип сөйләде Артур Мөхәммәтшин. Теркәү картасында «ак таплар» барлыкка килүен булдырмас өчен, Административ-техник инспекция идарәсе өченче экипажны җиһазлау мәсьәләсен тикшерә.