Казанда 2023 елда төзекләндереләчәк ишегалларында яшәүчеләр белән очрашулар башлана

Беренче җыелышлар 12 нче сентябрьдә була.

Фото: Денис Гордийко

(Казан шәһәре KZN.RU, 8 нче сентябрь). Казанда 2023 елда төзекләндереләчәк ишегалларында яшәүчеләр белән очрашулар башлана. Алар сентябрь һәм октябрьдә узачак.

Беренче җыелышлар 12 нче сентябрьдә була. Бу көнне Айдаров урамындагы 8 нче һәм 12 нче номерлы, Ленинград урамындагы 49а һәм 51а номерлы йортларда, Залесная урамындагы 18 нче йортта, Осиновская урамындагы 33 нче һәм 27/1 номерлы йортларда, Фатыйх Әмирхан урамындагы 28 нче, 30 нчы һәм 32 нче йортларда яшәүчеләр белән берничә очрашу уздырылачак.

Очрашуларның тулы графигын «Безнең ишегалды» программасы сайтында карарга мөмкин. Шулай ук җыелышка 10 көн кала идарәче оешмалар подъезд янында очрашу турында мәгълүмат урнаштырачаклар.

Фикер алышуда район администрациясе вәкилләре, идарәче оешма хезмәткәрләре, архитекторлар-проектлаучылар катнашачак, шулай ук кирәк булганда подрядчылар һәм техник күзәтчелек хезмәте вәкиле чакырыла.

Ишегалды төзекләндерелә башлаганчы, ким дигәндә 3 җыелыш үткәреләчәк, дип аңлата Татарстан шәһәрләрен үстерү институтының матбугат хезмәте. Беренчесе аеруча мөһим, чөнки башлангыч схема тикшерелә, анда яшәүчеләргә үз теләкләрен кертергә мөмкин һәм кирәк тә. Җыелышта программаның принциплары, мәҗбүри эш төрләре һәм аларны гамәлгә ашыру сроклары турында сөйләячәкләр. Аннан соң архитектор-проектлаучы машиналар йөрү өлеше һәм аның киңлеге ничек үзгәрәчәген, анда яңа тротуарлар һәм функциональ зоналар барлыкка киләчәк, ә идарәче оешма вәкилләре урам җиһазлары һәм чүп җыю мәйданчыкларының урнашу урыннары турында сөйләячәкләр, шулай ук барлык кимчелекләрне, сорауларны һәм теләкләрне теркәячәкләр. Архитекторлар, гамәлдәге төзелешне, ишегалды территориясенең зурлыгын, инженерлык челтәрләренең урнашу урынын һәм ишегалдының башка техник үзенчәлекләрен исәпкә алып, күпчелек кешеләрнең фикерләрен исәпкә алачак һәм эштә чагылдырачак.

Килә алмаучыларның теләкләрен идарәче оешма яки йорт буенча җаваплы кеше, шулай ук җыелышта булачак күршеләре аша өч көн эчендә тапшыру мөмкинлеге булачак. Гамәлдәге төзелеш һәм ишегалдының техник үзенчәлекләрен исәпкә алып, архитекторлар күпчелек яшәүчеләрнең фикерләрен исәпкә алачак һәм эштә чагылдырачак.

Шәһәрдәге барлык очрашулар тәмамлангач, проектлаучылар төзекләндерүнең йомгаклау схемаларын әзерли башлаячаклар, алар апрель аенда төзелеш эшләре башланганчы өч көн алдан тәкъдим ителәчәк.

Исегезгә төшерәбез, «Безнең ишегалды» программасы Татарстан Президенты Рөстәм Миңнеханов карары буенча 2020 елда старт алды. Узган ике елда Казанда асфальт-бетон өслекле, мәйданы 1,5 млн кв. метр булган 890 йорт ишегалды төзекләндерелгән. Уңайлыклар 200 мең яшәүчене колачлады.

Шулай ук укыгыз

Барлык яңалыклар