Казанда «Агым» медиалабораториясенең икенче сезоны башланды

Гаризаны 18 февральгә кадәр тапшырырга була

Денис Гордийко фотосы

Казан шәһәр иҗтимагый үзәге Татарстан башкаласының югары уку йортлары һәм урта һөнәри белем бирү учреждениеләре студентларын «Агым/Поток» белем бирү медиалабораториясенең икенче сезонында катнашырга чакыра. Булачак медиаөлкә вәкилләре өчен биш юнәлеш буенча онлайн һәм офлайн форматта 40 тан артык лекция һәм остаханәләр үткәреләчәк.

Медиалаборатория дүрт этаптан тора: гаризалар бирү кампаниясе 18 февральгә кадәр дәвам итә, әңгәмәләр һәм катнашучылар исемлеген төзү этабы 22 февральгә кадәр дип билгеләнгән, белем бирү интенсивы 4 мартта башлана һәм 4 апрельдә тәмамланырга тиеш. Бәяләү нәтиҗәләре буенча «Агым»да катнашучыларның иң яхшылары күчмә белем бирү программасында катнашачак.

Лабораториядә эш түбәндәге биш юнәлеш буенча: журналистлар, копирайтерлар һәм мәгълүмати-аралашу белгечләре өчен текстлар белән эшләү күнекмәләрен үстерүгә юнәлдерелгән «Агым. Мәгълүмат» белем бирү курсы; булачак һәм хәзерге вакытта эшли торган фотога төшерүчеләр өчен «Агым. Җитештерү» курсы; график дизайнерлар өчен «Агым. Күзаллау» дәресләре алып барылачак. Шулай ук булачак һәм хәзерге вакытта эшли торган SMM-белгечләр, креаторлар һәм бренд-менеджерлар өчен «Агым. Контент» курсы, медиапроектларның булачак һәм хәзерге җитәкчеләре, project-менеджерлары өчен «Агым. Аралашу» белем бирү дәресләре оештырыла.

Чара ахырында күчмә белем бирү программасына медиалабораториядә активлык күрсәткән һәм балл-рейтинг системасы нәтиҗәләре буенча иң яхшы дип табылган катнашучылар чакырыла. Студентлар өчен чакырылган спикерлар катнашында теоретик һәм практик дәресләр әзерләнә, реаль кейслар белән эш көтелә, соңыннан алар әзер медиапродуктларны яклаячак. Нәтиҗәләр бүләкләү тантанасында ясалачак.

Гаризаны 18 февральгә кадәр «Агым» медиалабораториясенең рәсми сайтында юлларга була.

Проект «Россия яшьләре. Грантлар» гранты ярдәме белән гамәлгә ашырыла.