Казанда дзюдо буенча «Зур шлем» халыкара турниры старт алды

Ачылу тантанасында РФ спорт министры Олег Матыцин, ТР Президенты Рөстәм Миңнеханов, Казан Мэры Илсур Метшин һәм башкалар катнашты.

Фото: Марат Мугинов

(Казан шәһәре KZN.RU, 6-нчы май). Казанда дзюдо буенча «Зур шлем» халыкара турниры ачылды. Тантаналы чара «Татнефть Арена» спорт сараенда узды, спортчыларны Россия Президенты ярдәмчесе Игорь Левитин, РФ спорт министры Олег Матыцин, ТР Президенты Рөстәм Миңнеханов, Халыкара дзюдо федерациясе (IJF) президенты Мариус Визер һәм Казан Мэры Илсур Метшин сәламләде.

Татарстан Республикасы Президенты Рөстәм Миңнеханов Казанда «Зур шлем» дзюдо буенча халыкара турнирны ачу тантанасында катнашты. Чарада шулай ук катнаштылар. Тантана узды

Рөстәм Миңнеханов ассызыклаганча, мондый мөһим спорт чарасын кабул итү – республика өчен зур горурлык. «Татарстанда дзюдо иң популяр спорт төрләренең берсе. Бүген 4,5 меңнән артык спортчы әлеге көрәш төре белән шөгыльләнә, һәм елдан-ел аларның саны арта гына бара», – дип ассызыклады ТР Президенты.

Ул билгеләп үткәнчә, Татарстанның эре спорт ярышларын оештыруда тәҗрибәсе зур. «Безнең зур хыялыбыз бар – республикада дзюдо буенча дөнья чемпионатын уздыру», – диде Рөстәм Миңнеханов.

Игорь Левитин РФ Президенты Владимир Путин исеменнән сәламләү телеграммасын укыды. «Мондый абруйлы һәм дәрәҗәле ярышларны уздыру хокукы Россиягә лаеклы бирелде. Безнең илдә һәрвакыт бу мавыктыргыч, динамик спорт төре, аның уникаль тарихы һәм философиясе белән кызыксыну югары булды. Ышанам, әлеге турнир әһәмиятле вакыйга булачак, белгечләрнең һәм дзюдоны күп санлы ихтирам итүчеләрнең киң игътибарын җәлеп итәчәк», – диелгән телеграмма текстында.

РФ спорт министры үз чиратында Татарстан җитәкчелегенә ярышларны югары дәрәҗәдә оештырулары өчен рәхмәт белдерде. «Бу катлаулы вакытта сез халыкара спорт форумнарын уздырганда традицион кунакчыллык һәм һөнәрилек күрсәтәсез», – диде Олег Матыцин.

«Зур шлем» дзюдо буенча дөнья сериясе турниры Казанда 5-7-нче май көннәрендә уза. Ярышлар Токиодагы Олимпия уеннарына квалификация этабы булып тора, анда 83 илдән 400-дән артык спортчы катнаша. Россия җыелмасыннан 55 атлет игълан ителгән. Барлыгы 14 комплект бүләк уйнатылачак, дип хәбәр итә ТР Президенты матбугат хезмәте.

Видеорепортаж