Казанда «Милләт кроссы» узды

Ярышта катнашучылар 1, 2 һәм 3 чакрым дистанцияне йөгереп үттеләр.

Фото: ТР Спорт министрлыгы

(Казан шәһәре KZN.RU, 11-нче октябрь). Кичә Казанның «Ак Барс Арена» стадионы территориясендә бөтенроссия йөгерү көне - «Милләт кроссы» узды. Беренчел мәгълүматлар буенча, ярышларда 18 меңгә якын кеше катнашты.

Бәйрәмдә катнашучылар арасында яшь спорт сөючеләр дә, спортчы-ветераннар да бар иде, алар өчен оештыручылар аерым старт әзерләде.

Ярышларны ачу тантанасында йөгерүдә катнашучыларны ТР спорт министры Владимир Леонов сәламләде. Ул чарада катнашучыларга активлыклары өчен рәхмәт белдерде һәм аларга спортта уңышлар теләде. «Бу вакыйга - үз спорт талантларыңны күрсәтү һәм вакытны файдалы уздыру өчен менә дигән мөмкинлек», - диде В.Леонов.

Аның белән бергә ярышларга Татарстан Республикасы Җиңел атлетика федерациясе президенты Хафиз Салихов старт бирде.

Программага 1, 2 һәм 3 чакрымга йөгерү, шул исәптән шәһәр мәктәпләре вәкилләре өчен ГТО йөгереше һәм шәһәр һәм республика ведомстволары җитәкчеләренең ярышы керде. Чараның кульминациясе 3 чакрымга массакүләм йөгерү булды.

Республика ведомстволары җитәкчеләре йөгерешендә ирләр арасында беренче урынны ТР Президенты ярдәмчесе Газинур Бакиров алды, икенче урынны ТР Министрлар Кабинеты Аппаратының Социаль үсеш идарәсе башлыгы урынбасары Алмаз Хәбибуллин яулады, өченче урынга ТР Министрлар Кабинеты Аппаратының Икътисад, финанслар һәм дәүләт милке белән эш итү идарәсе башлыгы Ренат Гайнетдинов ия булды. Хатын-кызлар арасында беренче урынны ТР хезмәт, мәшгульлек һәм социаль яклау министры Эльмира Зарипова алды, икенче урын ТР Министрлар Кабинеты Аппаратының Мәдәният һәм ТР халыклары телләрен үстерү идарәсе башлыгы урынбасары Елена Кондратьевага бирелде.

Ир-атлар арасында шәһәр ведомстволары җитәкчеләре йөгерешендә Парклар һәм скверлар дирекциясе җитәкчесе Марат Закиров җиңүче булды, икенче урында - Казан шәһәре Думасы депутаты Евгений Чекашов, өченче урында - Физик культура һәм спорт комитеты рәисе урынбасары Ришат Ибәтуллин. Хатын-кызлар арасында беренче урынны Киров һәм Мәскәү районнары администрациясе башлыгы урынбасары Алия Заһидуллина алды.

ГТО кысаларында 2 чакрымга йөгерүдә 16-17 яшьлек кызлар арасында Елизавета Гусакова (1-нче урын), Динә Даминова (2-нче урын) һәм Ольга Петренко (3-нче урын) призерлар булдылар. Шул ук яшьтәге яшүсмерләр арасында 3 чакрым дистанциядә Вячеслав Спиридонов җиңү яулады, 2-нче һәм 3-нче урыннарны Никита Леонов һәм Георгий Шегуров алды, дип хәбәр итә Физик культура һәм спорт комитеты.

Ярышлар Кулланучылар хокукларын яклау һәм кеше иминлеге өлкәсендә күзәтчелек федераль хезмәте тәкъдимнәре нигезендә оештырылды.

Шулай ук укыгыз

Барлык яңалыклар