Казанда җиңел атлетика буенча “Шиповка юных” Бөтенроссия ярышлары узачак

Турнирда Россиянең 65 шәһәреннән 1300-дән артык яшь спортчы катнашачак.

(Казан шәһәре KZN.RU, 20-нче март). 21 мартта Казанда җиңел атлетиканың дүрт төре буенча “Шиповка юных” Бөтенроссия ярышлары старт ала. Турнирда Россиянең 65 шәһәреннән 1300-дән артык яшь спортчы катнашачак.

Турнир 3 яшь төркеменә кергән егетләр һәм кызлар арасында узачак: 2008-2009 елгылар, 2006-2007 елгылар һәм 2004-2005 елда туганнар. Беренче булып 10-11 яшьтәге яшь җиңел атлетлар көч сынашачак. 21 март көнне балалар 60 метрга йөгерәчәк, озынлыкка яки биеклеккә (спортчының сайлавына карап) сикерәчәк. Ярышларның икенче көнендә, 22 мартта, катнашучыларны 500 һәм 600 метрга снаряд ату ярышы көтә. 24 һәм 25 мартта ярышларның шундый ук этапларын 12-13 яшьлек катнашучылар узачак, ә 27-28 март көннәрендә иң көчлеләр исеменә лаек булу өчен, зурлар – 14-15 яшьтәге җиңел атлетлар көч сынашачак.

Сүз уңаеннан, “Шиповка юных” турнирының беренче ярышлары 1981 елда, Мәскәү олимпиадасыннан соң ук, үткәрелгән. Иң беренче катнашучылар арасында – унике яшьлек Мәскәү укучысы Ирина Привалова, хәзерге вакытта Олимпия чемпионы, күп тапкырлар дөнья, Европа, Россия рекордчысы.

Шулай ук укыгыз

Барлык яңалыклар