Казанда Алман киносы көннәре узачак

Өч көнлек программада – төрле фестивальләрнең номинант фильмнары.

Фото: Казан шәһәре KZN.RU

(Казан шәһәре KZN.RU, 31 нче гыйнвар). 4 нче февральдән 6 нчы февральгә кадәр Казанның «Мир» кинотеатрында Алман киносы көннәре узачак. Программада – төрле фестивальләрнең номинант фильмнары.

Алман киносы көннәрен ачу тантанасы 4 нче февральдә 18:00 сәгатьтә булачак. Программа «Хердур» драмасын күрсәтүдән башланачак.

Шимбә көнне, 5 нче февральнең 18:30 сәгатендә, Берлиналеда иң яхшы конкурс эше буларак «Gilde» кинопремиясенә лаек булган «24 атна» фильмы күрсәтеләчәк.

Кино күрсәтү якшәмбе көнне, 6 нчы февральнең 18:30 сәгатендә, «Минем бетүем. Синең башлануың» картинасы белән тәмамланачак. Фильм «Filmfest München 2019» һәм «London Film Festival 2019» номинацияләре белән билгеләнгән. Моннан тыш, кинотасма 2019 елда Германия кинотәнкыйтьчеләре премиясенең берничә бүләген алган, дип хәбәр итә Казан милли тикшеренү техник университеты – Казан авиация институты матбугат хезмәте.

Алман киносы көннәре программасында шулай ук дискуссияләр, викториналар, уеннар һәм тамашачыларны тәмле ризыклар белән сыйлау планлаштырылган. Кино күрсәтүләрдә катнашучыларның алман телен яратучылар белән аралашу мөмкинлеге булачак. Фильмнарның анонсларын сайтта карарга мөмкин.

Чараны оештыручылар – Казан милли тикшеренү техник университеты – Казан авиация институтының Германия-Россия яңа технологияләр институты һәм «Татаркино» оешмасы. Әлеге чара Гете исемендәге институт ярдәме белән уза.

Шулай ук укыгыз

Барлык яңалыклар