Казанда «Рус фортепиано мәктәбе» амбассадорларының концерты булачак

Кунаклар Петр Чайковский, Ференц Лист, Фредерик Шопен һәм башка композиторларның әсәрләрен ишетә алачак

Казанда 7 октябрьдә «Рус фортепиано мәктәбе» проекты пианист-амбассадорларының концерты була. Музыкантлар танылган классик әсәрләрне уйнаячак.

Программада: Петр Чайковскийның «Времена года» циклыннан «Апрель», Фредерик Шопенның «Вальс ля минор, B. 150», Фрэнк Розенблатның «Джаззефина вальс» һәм «Восемь этюдов в джазовых тонах для юных виртуозов» циклыннан «Латино», Ференц Листның La Campanella, Милий Балакиревның «Исламей» көнчыгыш фантазиясе, Сергей Рахманиновның op.39 1, 6, 5 номерлы этюд-картиналары һәм башка композицияләр.

Тамашачылар алдында яшь пианистлар Николь Горгадзе, Агния Воронцова, Наил Мәүледов, Мария Махамендрикова һәм Тимофей Владимиров чыгыш ясаячак.

Кунакларны С.Сәйдәшев исемендәге Дәүләт Зур концертлар залында 19:00 сәгатьтә көтәчәкләр, керү билетлар буенча .

«Рус фортепиано мәктәбе. Мастерлар һәм безнең киләчәгебез» проектында рус пианизмы традицияләрен дәвам итүчеләр катнаша. Инициатива бөтен илдән яшь пианистларны эзләү һәм аларга ярдәм итүгә юнәлдерелгән. Проект нәтиҗәсендә алар Россиянең иң престижлы сәхнәләрендә чыгыш ясый һәм башкаруларын иң яхшы студияләрдә яздырта алачак. Концертлар миллионлы шәһәрләрдә һәм Россиянең төп академия сәхнәсе – П.И.Чайковский исемендәге Мәскәү консерваториясенең Зур залында уза. Проектны «Музыка империясе» гамәлгә ашыра, генераль продюсер – Тәбриз Шаһиди.

Шулай ук укыгыз

Барлык яңалыклар