Казанда «Чикләрсез ГТО» фестивале узды

Катнашучылар «Хезмәткә һәм оборонага әзер» физкультура-спорт комплексына керә торган сынауларда үз көчләрен сынап карый алды.

(Казан шәһәре KZN.RU, 22-нче октябрь, Алена Мирошниченко). Бүген Казанда Үзәк стадионның футбол-җиңел атлетика манежында сәламәтлекләре буенча мөмкинлекләре чикләнгән кешеләр өчен «Чикләрсез ГТО» спорт фестивале узды. Фестиваль 140-лап катнашучыны җыйды.

Чарага шулай ук Татарстан Республикасы спорт министры урынбасары Айрат Әхмәров, Казан Башкарма комитетының Спорт проектларын гамәлгә ашыру бүлеге башлыгы Роман Ивачев, Татарстан Республикасы Хезмәт, халыкны эш белән тәэмин итү һәм социаль яклау министрлыгының инвалидлар белән эшләү бүлеге башлыгы урынбасары Дарина Бәдретдинова һәм башкалар да кушылды.

Быелгы фестиваль - уникаль спорт чарасы, анда төрле инвалидлык формалары булган кешеләр «Хезмәткә һәм оборонага әзер» бөтенроссия физкультура-спорт комплексына керә торган сынауларда үз көчләрен сынап карый алды. Мондый чаралар шулай ук Россиянең җиде төбәгендә узды, аларда 1,5 меңнән артык кеше катнашты.

Бүген фестивальдә сәламәтлек мөмкинлекләре чикләнгән кешеләрне ГТО комплексының җайлаштырылган сынаулары көтте: протезларда йөгерү, коляскаларда узышу, яткан халәттә тартылу, билгеле бер дистанциягә йөгерү, туп ыргыту, каршылыклар полосасы һәм башкалар. Моннан тыш, барлык теләүчеләр скандинавия йөрешенең классик вариантында һәм коляскаларда, фехтование, бочча, коляскаларда баскетбол һәм башка спорт төрләре буенча мастер-классларда катнаша алдылар.

Моннан тыш, биредә инклюзив мәйданчык оештырылды, анда терәк-хәрәкәт аппаратына зыян килгән кешеләрнең көндәлек тормышка ничек җайлашуын үз өстеңдә тоеп карарга мөмкин иде.

Инвалидлыгы булган кешеләр өчен физик культураны үстерү буенча «Чикләрсез ГТО – инклюзив спорт хәрәкәте» бөтенроссия проектын Президент грантлары фонды ярдәме белән «Сопричастность» мөмкинлекләре чикләнгән кешеләргә ярдәм итү фонды гамәлгә ашыра.

Фоторепортаж

Казанда «Чикләрсез ГТО» фестивале узды

Шулай ук укыгыз

Барлык яңалыклар