Денис Калинкин шәһәрдә оештырылган авыл хуҗалыгы ярминкәләрендә продукция ассортименты белән танышты

Казанда традицион шимбә авыл хуҗалыгы ярминкәләре уза.

(Казан шәһәре KZN.RU, 28-нче сентябрь, Ксения Швецова). Казанда традицион шимбә авыл хуҗалыгы ярминкәләре уза. Сәүдә иртәнге алтыда шәһәрнең барлык районнарындагы 15 мәйданчыкта оештырылды. Бүген Башкарма комитет җитәкчесе Денис Калинкин көзге авыл хуҗалыгы ярминкәләрендә тәкъдим ителгән продукциянең ассортиментын бәяләде. Ул Яңа Савин районындагы Ямашев проспекты, 71а адресы буенча урнашкан сәүдә мәйданчыгында, шулай ук Киров районындагы Батыршин урамы буенча оештырылган ярминкәдә булды.

Ярминкәләр иртәдән үк ачылды – Ямашев проспекты буенча урнашкан сәүдә мәйданчыгы 6.00 сәгатьтә үк сатып алучылар белән тулган, ә кайбер палаткаларга чиратлар да тезелә башлаган иде. Биредә шәһәр халкы төрле продуктлар сатып ала ала: ит, казылык, сөт, сыр, май, йомырка, яшелчә, бал, шикәр, он, ярмалар һәм башкалар.

«Кешеләр әле биредә аз, сәгать җиде-сигезләрдә монда сатып алучылар тагын да күбрәк булачак, - диде дуңгыз итеннән ит продуктлары җитештерә торган фирма исеменнән Ренат Низамиев. - Без Әлки районыннан киләбез, тугыз мәйданчыкта сәүдә нокта ачабыз. Продукцияләребезне арадашчылардан башка сату мөмкинлеге - бу безнең өчен генә түгел, ә беренче чиратта шәһәр халкы өчен зур плюс. Безне яхшы беләләр, берничә сәгать эчендә барысын да сатып бетерәбез».

Денис Калинкин сәүдә рәтләрен карады, җитештерүчеләр һәм фермерлар белән аралашты һәм ярминкәдә тәкъдим ителгән продукциянең киң ассортиментын билгеләп үтте.

Шулай ук Башкарма комитет башлыгы Киров районында Батыршин урамы буенча оештырылган ярминкәне карады, анда бүген Буа, Кама Тамагы, Югары Ослан муниципаль районнары фермерлары, шулай ук «Татпотребсоюз» предприятиеләре, «Ак Барс» кошчылык комплексының Лаеш филиалы һәм башкалар катнашты.

«Янәшәдә генә яшим, шуңа күрә бик уңайлы, - дип сөйләде Казанның Киров районында яшәүче пенсионер ханым Людмила Сергеевна. - Барысы да канәгатьләндерә дип әйтә алам. Кибетләргә караганда, күпкә сыйфатлырак, шуңа күрә монда киләбез дә. Кышын да шулай итеп сыйфатлы һәм арзан азык-төлек сатып алу мөмкинлеге булса, бик шат булыр идек».

«Бу - быел Казанда үткәрелә торган өченче көзге ярминкә инде, - дип билгеләп үтте Кулланучылар базары комитеты рәисе Руслан Фазылҗанов. - Биредә азык-төлек социаль юнәлешле бәяләрдән сатыла, без шәһәр халкын авыл хуҗалыгы ярминкәләренә чакырабыз».

Исегезгә төшерәбез, көзге ярминкәләр 14-нче сентябрьдә старт алды һәм атна саен салкыннар башланганчы үткәреләчәк. Һәр сәүдә мәйданчыгы эшендә Татарстанның 24 муниципаль районы, шулай ук республика агросәнәгать комплексының 32 оешмасы катнаша.

«Салават күпере» торак комплексында яшәүчеләр өчен ярминкәләр Осиново бистәсендә «Радужный» сәүдә үзәге янындагы мәйданчыкта үткәрелә. Биредә шулай ук иртә таңнан актив сәүдә эше бара - микрорайонда яшәүчеләр яңа өлгергән фермер продукциясен бик теләп сатып алалар. Сүз уңаеннан, торак комплекста яшәүчеләр өчен ярминкә мәйданчыгын Нарихан Фәттах урамындагы 19-нчы номерлы йорт янындагы территориягә күчергән иделәр, әмма бу шәһәрлеләр өчен уңайсыз булып чыкты, шуңа да ярминкә иске урынга - микрорайонда яшәүчеләр өчен иң уңайлырак җиргә күчерелде.

Шәһәрнең һәр районында оештырылган сәүдә мәйданчыкларының тулы исемлеге белән сылтама буенча танышырга мөмкин.