Казанда традицион агач ботакларын кисү эшләре бара

Ул мартка кадәр - үсемлекләрдә бөреләр чыга башлаганчы дәвам итә.

(Казан шәһәре KZN.RU, 29-нчы октябрь, Алена Мирошниченко). Казанда традицион агач ботакларын санитар һәм формалап кисү эшләре бара. Якындагы дүрт айда агачларның ябалдашларын һәм коры ботакларын кисәчәкләр.

KZN.RU порталына Казанның Тышкы төзекләндерү комитетының яшел үсентеләрне һәм массакүләм ял итү урыннарын карап тоту бүлегендә хәбәр итүләренчә, традицион рәвештә агачларны кисү салкыннар башлану белән, яфрак төшкәннән соң, октябрь-ноябрь айларында башлана. Ул мартка кадәр - үсемлекләрдә бөреләр чыга башлаганчы дәвам итә. Тулаем алганда, комитетта аңлатуларынча, агач ботакларын кисүнең өч төре бар – санитар максатта, форма ясап һәм яшәртү өчен.

«Беренче чиратта, киң ботаклары һәм куе ябалдашлары аркасында өрәңге һәм тирәк агачлары эшкәртүгә мохтаҗ. Аларны, беренче чиратта, куркынычсызлык максатларында кисәргә кирәк. Санитар эшкәртү коры яфракларны кисүне күздә тота – ул ел әйләнәсе үткәрелә. Форма ясап кисү ябалдашларның җилкәнлеген киметергә һәм агач төшүне кисәтергә булыша, ә яшәртү өчен башкарыла торган кисү үсемлекләрдә яшь үрентеләрнең үсешен стимуллаштырырга тиеш», - дип билгеләде Тышкы төзекләндерү комитетының яшел үсентеләрне һәм массакүләм ял итү урыннарын карап тоту бүлеге башлыгы урынбасары Лилия Кәлимуллина.

Эшкәртүдән соң киселгән урыннарга майлы буяу яки бакча вәре (кайнатылган сумала) сылыйлар. Әлеге эшләр нәтиҗәсендә агачларның тормыш циклы озайтыла һәм аларның декоративлыгы саклана, дип билгеләп үттеләр комитетта.

Шулай ук укыгыз

Барлык яңалыклар