Казанда һаваны зарарсызландыру җайланмалары булган такси барлыкка килде

Приборлар инде 15 машинага урнаштырылган.

Фото: Денис Гордийко

(Казан шәһәре KZN.RU, 23-нче октябрь). Казанда һаваны зарарсызландыру җайланмалары белән җиһазландырылган такси барлыкка килде. Компактлы гаджетлар пассажирларны авыру тудыра торган вируслардан һәм бактерияләрдән автомобиль салонында һаваны өзлексез зарарсызландырып саклый. Хәзерге вакытта приборлар 15 машинада урнаштырылган. Бу хакта Казан Мэриясенең матбугат хезмәте хәбәр итә.

Ультрашәмәхәле рециркулятор нибары 100 грамм авырлыкта, USB кабеле аша тоташтырыла һәм сәгатенә 14 кубометрга кадәр һава эшкәртә ала, ул ике каты ультрашәмәхә нурланышы булган зарарсызландыру камерасы аша уза. Гаджетларны «Росэлектроника» дәүләт корпорациясенең «Ростех» холдингы тәкъдим итте.

Җитештерүче әйтүенчә, җайланмалар кеше өчен бөтенләй зарарсыз, шуңа күрә һәр пассажирны максималь саклауны тәэмин итү өчен өзлексез эшли алалар.

Октябрь ахырына холдинг 250 прибор куячак, ә ноябрьдә – 1000, алар миллионлы Россия шәһәрләре арасында бүленәчәк, шул исәптән чираттагы поставка Казанга да планлаштырылган. Ел ахырына кадәр җайланмалар Мәскәү, Санкт-Петербург, Новосибирск, Екатеринбург, Краснодар, Омск һәм башка шәһәрләрдә барлыкка киләчәк.

Шулай ук укыгыз

Барлык яңалыклар