Казанда Рудольф Нуриев турында фильмнар һәм аның сирәк фотолары күрсәтеләчәк

ТР башкаласында «Нуриев сезоны» халыкара мәдәни проекты старт ала.

Фото: Денис Гордийко

(Казан шәһәреKZN.RU, 15 нче март). «Нуриев сезоны» халыкара мәдәни проекты Казанда 23 нче мартта старт ала. «Мир» кинотеатрында Рудольф Нуриев турында фильмнар күрсәтеләчәк, фотокүргәзмә һәм балет артистының дуслары белән очрашулар узачак.

Казанлылар «Рудольф Нуриев. Чит утрау», «Рудольф Нуриев. Соңгы бию», «Россиясез рус балеты», «Визит», «Рудольф Нуриев: Азатлыкка омтылган бию» һәм «Венеция, Карнавал, Мәхәббәт» дигән кинокартиналарны карый алачак. Сеансларга керү кинотеатр сайтында алдан теркәлү буенча башкарылачак. Фильмнар күрсәтелгәнче, тамашачылар белән артистны белгән Россия сәнгать эшлеклеләре, шулай ук аның хезмәттәшләре һәм дуслары очрашачак.

Фестиваль көннәрендә, 24-27 нче мартта, кинотеатрда «Рудольф Нуриев. Кайту» фотоэкспозициясе эшләячәк. Күргәзмәдә артистның Россиягә кайткан елларында төшерелгән сирәк фотолары тәкъдим ителәчәк, дип хәбәр итә кинотеатрның матбугат хезмәте.

«Нуриев сезоны» халыкара мәдәни проекты беренче тапкыр 2018 елда, Нуриевның тууына 80 ел тулу елында һәм рус балеты елында узды. Быел чаралар Мәскәүдә, Казанда һәм Уфада узачак. Татарстан башкаласы белән балет артистын әнисенең чыгышы һәм Муса Җәлил исемендәге Татар дәүләт академия опера һәм балет театры белән хезмәттәшлеге бәйли, анда Нуреев 1992 елда дирижер сыйфатында чыгыш ясый.

Шулай ук укыгыз

Барлык яңалыклар