Казанда Чернобыль АЭСындагы авария ликвидациясендә катнашучыларны искә алдылар

Традицион истәлекле чара җәмәгатьчелек катнашыннан башка узды.

(Казан шәһәре KZN.RU, 26-нчы апрель). Бүген Казанда Чернобыль атом электростанциясендәге аварияне юкка чыгаруда катнашучыларны искә алдылар. Гирляндалар кую тантанасы Ямашев проспекты скверында узды. Быел санитар-эпидемиологик вәзгыять булганга, традицион истәлекле чара җәмәгатьчелек катнашыннан башка узды.

Әмма көн дәвамында ликвидатор-геройлар мемориалына 34 ел элек булган аварияне бетерү катнашучылары, аларның туганнары, хезмәттәшләре килә һәм чәчәкләр салалар, дип хәбәр итә Балалар һәм яшьләр эшләре комитеты.

1986 елның 26-нчы апрелендә XX гасырның иң куркыныч техноген фаҗигасе - Чернобыль АЭСында авария була. Реактордагы янгын нәтиҗәсендә атмосферага 190 тоннага якын радиоактив матдәләр чыгарылган. 400 меңнән артык кеше экологик бәла-каза зонасында кала һәм нурланышка дучар була, ул Хиросимдагы атом бомбасы нурланышыннан соң 90 тапкырга артып киткән. Элеккеге Советлар Союзының 19 өлкәсе, 5908 торак пункты радионуклидлар тарафыннан зарарлана. Аларның территориясендә 4 млн 430 мең кеше яшәгән, алар радиация-химия буранының коточкыч нәтиҗәләренә дучар булган.

Һәлакәт ликвидаторлары бу һәлакәтнең нәтиҗәләрен киметү өчен мөмкин булганның барысын да эшләгәннәр. Үз сәламәтлекләрен һәм киләчәген куркыныч астына куеп, 350 меңгә якын кеше - хәрбиләр һәм гражданнар - куркыныч радиоактив стихия белән көрәшкән. Алар арасында радиация кыры аша 3,5 меңгә якын татарстанлы узган.

2003 елдан Берләшкән Милләтләр Оешмасы 26-нчы апрельне Халыкара радиация һәлакәтләре корбаннарын искә алу көне дип игълан итте.

Шулай ук укыгыз

Барлык яңалыклар