Казанда «Сыйфатлы имин юллар» илкүләм проекты буенча тугыз урам участогы ремонтланачак

Агымдагы ел ахырына ТР башкаласында илкүләм проектның максатчан күрсәткеченә ирешеләчәк – норматив хәлдә булган юллар өлеше 85% ка кадәр артачак

Фото: Денис Гордийко

Быел «Сыйфатлы имин юллар» илкүләм проекты буенча Казанда тугыз урам участогы ремонтланачак. Аларның гомуми озынлыгы 6,3 километрны тәшкил итә. Әлеге максатларга 1,56 млрд сум бүлеп бирү каралган. Бу хакта эшлекле дүшәмбедә шәһәр Башкарма комитеты җитәкчесе урынбасары Игорь Куляжев хәбәр итте.

«Соңгы елларда башкарылган юл эшләренең күләме, чыннан да, бик зур. Димәк, нәтиҗәләр дә шундый ук. Быел без «Сыйфатлы имин юллар» илкүләм проектының максатчан күрсәткеченә ирешәчәкбез – юлларның 85% ы норматив хәлдә булачак. Хәзер бу юнәлештә эш системалы рәвештә алып барыла», – диде Казан Башкарма комитеты җитәкчесе Рөстәм Гафаров.

Игорь Куляжев сүзләренә караганда, бүген ТР башкаласында норматив хәлдәге юллар өлеше 84,7% дип бәяләнә. Әлеге күрсәткечне ел ахырына 85% ка кадәр арттырырга планлаштыралар.

Эшләр комплексы кысаларында юлларның асфальт-бетон өслекләрен, тротуарларны ремонтлау, куркынычсызлык коймалары, юл билгеләре, тышкы яктырту челтәрләре һәм светофор объектлары урнаштыру каралган.

Атап әйткәндә, Гаврилов (Маршал Чуйков урамыннан Ямашев проспектына кадәр), Копылов (Тэцевская урамыннан Воровский урамына кадәр), Заслонов, Галимҗан Баруди (Краснококшайск урамыннан Батыршин урамына кадәр), Химиклар (Беломорск урамыннан Моисеев урамына кадәр), Моисеев (Гудованцев урамыннан Химиклар урамына кадәр) урамнарындагы, Ибраһимов проспектындагы (Восстание урамыннан Воровский урамына кадәр), Себер трактындагы (Космонавтлар урамыннан Академик Арбузов урамына кадәр) участоклар, шулай ук Отар торак массивындагы Центральная урамыннан «Иске Победилово торак массивы» тукталышына кадәрге участок төзекләндереләчәк.

«Ремонт ике объектта: Ибраһимов проспектында һәм Себер трактында башланды. Калганнары буенча әзерлек эшләре алып барыла», – диде Игорь Куляжев.

Быел барлыгы 40 юл участогын ремонтлау планлаштырыла. Шәһәрнең юл челтәрен үстерүгә һәм ремонтлауга 16,3 млрд сум акча бүлеп бирелгән.

Камилә Вилданова

Фото: Марат Мөгыйнов