Казанда яңа маршрут челтәрен эшләргә планлаштыралар

Гамәлдәге челтәр үзенең нәтиҗәлелеге буенча Россиянең иң эре шәһәрләре арасында лидерлар өчлегенә керә, әмма автомобильләштерү үсүгә бәйле рәвештә үсеш таләп итә.

Фото: Денис Гордийко

(Казан шәһәре KZN.RU, 16-нчы декабрь, Ксения Швецова). Казанда киләсе ел башына муниципаль парковкаларда урыннар санын 6,2 меңгә кадәр арттыру планлаштырыла. Җәмәгать транспортына уңайлырак булсын өчен яңа маршрут челтәрен эшләү эше дә параллель рәвештә алып барыла. Ике карар да автомобильләштерүне тоткарлауга юнәлтелгән, дип хәбәр итте бүген Казан шәһәр Башкарма комитеты җитәкчесе урынбасары Илдар Шакиров.

И.Шакиров Казанның Социаль-икътисадый үсеш стратегиясенә кертелгән үзгәрешләр турында фикер алышу барышында парковка киңлеген үстерү планнары белән уртаклашты. Документта 2030 елга муниципаль парковкаларда машина урыннары санын 10 меңгә кадәр җиткерү каралган. «Муниципаль парковкалар – автомобильләштерү төзелешен тоткарлау инструментларының берсе. Шәһәрдә машиналар саны соңгы 15 елда 3 мәртәбә артты, бүгенге көндә 455 мең автомобильгә җитте», – диде И.Шакиров.

Шәһәрдә җәмәгать транспорты өлешен бүгенге көн дәрәҗәсендә саклап калу өчен, алга таба зур адым ясарга кирәк, дип саный Казан Башкарма комитеты җитәкчесе урынбасары. «Казанлыларның сайлавы җәмәгать транспорты файдасына булсын өчен, без аны сыйфатлы, һәркем өчен үтемле һәм җәдвәл буенча гына йөри торган итәргә тиеш. Системаны һәрвакыт камилләштерергә кирәк, – дип аңлатты И. Шакиров. – Без моның өстендә эшлибез».

Казан Мэры Илсур Метшин карары белән Казанның яңа маршрут челтәрен эшләү өчен подрядчыны сайлау буенча аукцион үткәрүгә акча бүлеп бирелгән, дип хәбәр итте И.Шакиров. Яңа челтәр пассажирлар өчен сыйфатлы һәм уңайлы, предприятиеләр эше ягыннан икътисадый нигезләнгән булырга тиеш.

«Илебезнең алдынгы фәнни-тикшеренү институтларының берсе безгә бу маршрут челтәрен тәкъдим иткәннән соң, без агымдагы эшкә үзгәрешләр кертәчәкбез. Ихтимал, маршрутлар саны үзгәрәчәк, һәм бу үзгәрешләрне без стратегиягә кертәчәкбез», – дип аңлатты И.Шакиров.

Бүген Казанның транспорт челтәре, күп кенә Россия экспертлары фикеренчә, иң заманча һәм уңайлылардан санала, дип өстәде ул. Шәһәр маршрутларында уңайлы автобуслар кулланыла, алар сыйфатның алдынгы стандартларына туры килә, экологик стандарт двигателе белән «Евро-4» һәм «Евро-5»тән түбәнрәк түгел. Моннан тыш, Казанда юл хәрәкәте белән идарә итүнең адаптив системасы кертелгән, ул интеллектуаль транспорт системасының бер өлеше булып тора һәм хәрәкәтне «яшел дулкын» режимында оештырырга, шулай ук автобусларның өстенлекле үтүен тәэмин итәргә мөмкинлек бирә.

«Симетра» компаниясе уздырган тикшеренүгә караганда, маршрут челтәре нәтиҗәлелеге буенча Татарстан башкаласы илнең 76 иң зур шәһәре арасында лидерлар өчлегенә керә. Без бу юнәлештә эшләүне дәвам итәчәкбез, – диде И.Шакиров.