Казанда Гайдар исемендәге яшьләр үзәге, алты китапханә, ике яшүсмерләр клубы һәм «Ышаныч» үзәге бинасы ремонтланачак

Китапханәләр китаплардагы чиплар, өстәлләргә урнаштырылган яктылык датчиклары һәм сенсорлы экраннар белән җиһазландырылачак

Фото: Денис Гордийко

Быел Гайдар исемендәге яшьләр үзәген капиталь ремонтлаячаклар. Казанның социаль өлкә учреждениеләрен карап тоту һәм аларга хезмәт күрсәтү департаменты директоры Илья Коротихин хәбәр иткәнчә, биредә подвалны су басу проблемасын хәл итү, пандусларны, яңгыр һәм кар суларын читкә чыгару системасын төзекләндерү буенча эшләр башкарылачак. Шулай ук «Лидер» (Подлужная урамы, 49) һәм «Без» (Солидарность урамы, 12) яшүсмерләр клубларында да капиталь ремонт үткәрү планлаштырыла.

Ул капиталь төзекләндерү шәһәрнең алты китапханәсенә дә кагылачак, дип өстәде. Бүгенге көндә проект-смета документациясен әзерләү белән бәйле эшләр гамәлгә ашырыла.

«Концепцияләр расланды, беренчел дизайн-проектка нигезләнеп, планлаштыруга кагылышлы чишелешләр билгеләнде. Архитектура һәм инженерлык белән бәйле мәсьәләләр буенча килештерү эшләре алып барыла. Шулай ук китапханәләрдә заманча җиһазлар: китаплардагы чиплар, өстәлләргә урнаштырылган яктылык датчиклары, китапларны автомат рәвештә бирү һәм тапшыру өчен сенсорлы экраннар пәйда булачак», – дип йомгаклады Илья Коротихин.

Шулай ук быел Казанда муниципалитет балансына тапшырылган бинада (Җиңү проспекты, 100), төзекләндерү эшләре тәмамланганнан соң, «Ышаныч» үзәгенең тагын бер бүлеге ачылачак. Исегезгә төшерәбез, 2022 елдан башлап «Ышаныч» үзәге карамагына 16 бина тапшырылган, шуларның алтысы – яңа, калганнары – җитди реновациядән соң.

Диләрә Гафурова