Казанда Федор Шаляпинның тууына 151 ел тулуны билгеләп үтәчәкләр

Көн дәвамында программа чараларына керү бушлай булачак

Фото: Дениис Гордийко

Җәяүле экскурсия, «Шаляпин – зур гаилә башлыгы» проектын тәкъдир итү, республиканың Дәүләт камера хоры концерты – Казанда Федор Шаляпинның тууына 151 ел тулуны бәйрәм итәчәкләр. Көн дәвамында чараларга керү бушлай булачак, дип хәбәр итә ТР Милли музее матбугат хезмәте.

«“Ф.И.Шаляпинга бүләк” программасы ел саен үткәрелә. 2024 ел Россиядә Гаилә елы дип игълан ителде, һәм быел безнең тарафтан әзерләнгән төп чара – Федор Иванович гаиләсенә багышланган күргәзмә. Бу ике музей – Горький һәм Шаляпин музее һәм Казан музей комплексы коллекцияләрен бер мәйданда берләштергән тәүге проект», – ди Горький һәм Шаляпин музее мөдире Марианна Гаврилова.

«Ф.И.Шаляпинга бүләк» программасы чаралары:

12:00–12:45 – Ф.И.Шаляпин һәйкәленә чәчәкләр салу тантанасы (Бауман урамы, 80)

12:45–13:30 – Ф.И.Шаляпин һәйкәленә чәчәкләр салу тантанасында катнашучылар өчен Казанның Шаляпин урыннары буйлап бушлай җәяүле экскурсия (Бауман урамы, 80 – Горький урамы, 10)

13:30–14:00 – Б.Әлмәнов исемендәге 3 нче номерлы балалар сәнгать мәктәбе укучыларының «Музыка төсләрдә» күргәзмәсен тәкъдир итү (Горький урамы, 10)

14:00–15:00 – Ф.И.Шаляпин иҗатын сөючеләрнең Казан җәмгыяте җитәкчесе Ирина Вавиличеваның «Ф.И.Шаляпин һәм рус сәнгате» лекциясе

15:00–16:00 – А.М.Горький һәм Ф.И.Шаляпин музееның һәм Казан музей комплексының «Шаляпин – зур гаилә башлыгы» дип аталган уртак күргәзмә проектын тәкъдир итү (Горький урамы, 10)

16:00–17:00 – ТР халык артисты Миләүшә Тәминдарова җитәкчелегендә Татарстан Республикасының Дәүләт камера хоры концерты (Горький урамы, 10)

17:00 –18:30 – А.М.Горький һәм Ф.И.Шаляпин музее экспозициясе буенча бушлай экскурсия (Горький урамы, 10).