Казанда яңа Фехтование үзәге ачылды

Казанда яңа Фехтование үзәге ачылды

<p> Бүген Казанда Короленко урамында яңа фехтование үзәген ачу тантанасы узды. Анда 100дән артык спортчы шөгыльләнә алачак. Ачылу тантанасында ТР рәисе Рөстәм Миңнеханов, Казан мэры Илсур Метшин һәм Россия фехтование федерациясе президенты Илгар Мәмүдов катнашты. </p> <p> Объект Короленко урамында урнашкан. Спорт комплексында ике зур универсаль спорт залы, тренажер залы, душ белән уңайлы чишенү бүлмәләре, медицина кабинеты бар. Яңа үзәкнең үткәрү сәләте – 100 дән артык кеше, дип хәбәр итә ТР рәисенең матбугат хезмәте. </p> <p> Мәртәбәле кунаклар Казан фехтование мәктәбен данлаган олимпия чемпионнары Наилә Гыйләҗева һәм Марта Мартьянова белән аралашты. </p> <p> Үз чыгышында Рөстәм Миңнеханов чарада катнашучыларын якынлашып килүче Республика көне белән котлады. Ул билгеләп үткәнчә, Татарстанның фехтование традицияләре бик яхшы. «Бүген без фехтование буенча иң заманча үзәкне ачабыз, анда тренировка процессы һәм ярышларны оештыру өчен барлык шартлар да тудырылган. Фехтование традицияләребезне яшь спортчылар дәвам итәргә тиеш. Уңышлар сезгә!», – диде Татарстан рәисе. </p> <p> Наилә Гыйләҗева республика җитәкчелегенә шундый мөһим проектны гамәлгә ашырганнары өчен рәхмәт белдерде. «Мин яшь спортчылар өчен чын күңелдән шат. Биредә алар өчен кирәкле, яхшы шартлар бар. Алга таба ,яңа җиңүләргә», – дип билгеләп үтте 1976 елгы Олимпия уеннары чемпионы. </p> <p> Бүген Татарстанда 1 меңнән артык кеше фехтование белән шөгыльләнә. Спортчылар белән күнегү эшен 25 тренер алып бара. Россия җыелма командасы составына республикадан 11 кеше керде. Татарстанда ел саен фехтование буенча Татарстан Республикасы чемпионатлары, беренчелекләре һәм Кубоклары, шулай ук төрле яшьтәге бөтенроссия һәм төбәкара ярышлар уздырыла. </p>

2025-08-29T10:59:28+0300