Казанда дары заводы хезмәткәрләре - сугыш ветераннарының Дан аллеясы ачылды

Тантанада республика Президенты Рөстәм Миңнеханов һәм шәһәр Мэры Илсур Метшин катнашты.

(Казан шәһәре KZN.RU, 24-нче июнь). Татарстан башкаласында «Казан дары заводы хезмәткәрләре - 1941-1945 еллардагы Бөек Ватан сугышы ветераннарының Дан аллеясы» мемориалы ачылды. Тантанада Татарстан Республикасы Президенты Рөстәм Миңнеханов, Казан Мэры Илсур Метшин һәм башкалар катнашты.

Мемориал Татарстан Хөкүмәте һәм Казан Мэриясе ярдәме белән Петров исемендәге паркта Бөек Ватан сугышында Җиңүнең 75 еллыгы, ТАССР төзелүнең 100 еллыгы һәм Казан дары заводының 232 еллыгы уңаеннан ачылды.

Чарада катнашучылар мемориалга чәчәкләр салдылар. Рөстәм Миңнеханов ветераннар белән аралашты, аннары фотога төшү оештырылды, дип хәбәр итә ТР Президенты матбугат хезмәте.

Казан дары заводы сугыш вакытында фронт өчен мөһим стратегик продукция җитештерә. 2 меңнән артык эшче завод цехларыннан фронтка китә. Бөек Ватан сугышы елларында фидакарь хезмәте өчен предприятие I дәрәҗә Ватан сугышы ордены белән бүләкләнгән, ә «Тыл хезмәтчәне» исемен 5 мең 448 завод кешесе алган.

Заводның аерым горурлыгы - 8 Советлар Союзы Герое. Алар арасында Борис Кириллович Кузнецов - Татарстанда бердәнбер исән калган Советлар Союзы Герое, 1945 елда Мәскәүдәге Кызыл мәйданда узган Җиңү парады катнашучысы.