Казанның Урицкий паркында балалар аттракционнары урнаштырудан баш тартканнар

Әлеге карар кичә «Мәскәү» мәдәни үзәгендә узган җәмәгатьчелек фикер алышуларында кабул ителде.

Фото: Денис Гордийко

(Казан шәһәре KZN.RU, 10 нчы февраль). Казанның Урицкий паркында балалар өчен аттракционнар урнаштырмаячаклар. Бу хакта карар кичә «Мәскәү» мәдәни-күңел ачу үзәгендә узган җәмәгатьчелек фикер алышулары нәтиҗәләре буенча кабул ителде. Очрашуда шәһәрлеләр, Казанның Парклар һәм скверлар дирекциясе, район хакимияте вәкилләре, Казанның баш архитекторы урынбасары Дарья Толовенкова катнашты.

Фикер алышу вакытында күпчелек халык аттракционнарны паркта урнаштыруга каршы тавыш бирде. Казанның Парклар һәм скверлар дирекциясе оештырган онлайн-тавыш бирү нәтиҗәләре дә шундый булып чыкты. Әйтик, 9 нчы февральдә 20:00 гә сораштыруда катнашучыларның 82,6% ы – каршы, 17,4% ы – риза, дип хәбәр итә дирекциянең матбугат хезмәте

Исегезгә төшерәбез, узган елның декабрендә электрон аукцион барышында эшмәкәр Васильченко урамы ягыннан Урицкий исемендәге парк территориясендә стационар булмаган сәүдә объектын урнаштыру хокукына ия булды. Анда эшмәкәр балалар аттракционнары белән шәһәрчек урнаштырырга ниятләгән. Җирле халык Казанның Парклар һәм скверлар дирекциясенә әлеге карарны яңадан карау үтенече белән мөрәҗәгать итте. Җәмәгатьчелек фикер алышуларыннан соң эшмәкәр белән килешүне өзәргә карар кылынган.

Шулай ук укыгыз

Барлык яңалыклар