Казанда Касә янындагы боз шәһәрчеген һәм Яңа ел чыршысын демонтажлау эшләре башлана

Мондый карар боз конструкцияләре һәм таулары эрү сәбәпле, бәхетсезлек очракларын булдырмас өчен кабул ителде.

(Казан шәһәре KZN.RU, 27-нче гыйнвар, Алена Мирошниченко). Татарстан башкаласында «Казан» Гаилә үзәге янындагы боз шәһәрчеген һәм Яңа ел чыршысын сүтүгә керешәчәкләр. Мондый карар шәһәрлеләрнең иминлеген тәэмин итү һәм бәхетсезлек очракларын булдырмас өчен кабул ителде. Бу хакта бүген Тышкы төзекләндерү комитетының Капиталь ремонт, төзелеш һәм реконструкция бүлеге башлыгы Марат Хәйруллин хәбәр итте.

16-нчы гыйнвардан бирле аномаль җылы һава торышы тору сәбәпле, «Казан» гаилә үзәге янында боз шәһәрчеге эше туктатылды. 16-нчы гыйнвардан 22-нче гыйнварга кадәр +1-дән +3 градуска кадәр уңай температура күрсәткечләре сакланды. Бу боз блокларының торышына тискәре йогынты ясады, алар арасында 1,5-12 метр биеклектә төрле фигуралар һәм таулар формалашкан. «Кыш өчен хас булмаган һава торышы боз сыннарының һәм конструкцияләренең 80-90%-ы канәгатьләнмәслек хәлгә килгән, тауларның хәтта агач каймалары-каркаслары да ачылган. Аларны алга таба эксплуатацияләү мөмкин түгел», - диде М.Хәйруллин.

Дүшәмбедән температураның минус 5-7 градуска кадәр төшүе хәлне үзгәртмәячәк, чөнки боз блоклары озак вакыт җылы һава торышы тору аркасында кире кайтарып булмас хәлгә деформацияләнгән. Әйтик, биек боз тауларында блокларның эрүе аларның җимерелү куркынычына китергән.

Бәхетсезлек очракларын булдырмас өчен боз шәһәрчеген сүтә башлау турында карар кабул ителде. Эшләр бүген башлана. Төп чыршы тирәли урнаштырылган фигураларны һәм боздан ясалган койманы демонтажлаганнан соң, подрядчы оешма Яңа ел чыршысы конструкциясен сүтүгә керешәчәк. Барлык эшләрне 20-нче февральдә тәмамлау планлаштырыла.

Исегезгә төшерәбез, 26-нчы декабрьдә боз шәһәрчеге ачылганнан алып эш туктатылганчыга кадәр анда 470 меңгә якын кеше булды. Шәһәрчекнең төп эше Яңа ел каникулларына туры килде.

Комплексның төп бизәге - 35 метр биеклектәге, яктылык-дианмика бизәлеше һәм якты музыка тамашасын үткәрү өчен анимацияләнгән гөмбәзле яңа ел чыршысы. Чыршы тирәсендә төрле яшьтәге кешеләр өчен фигуралы һәм таулы боз шәһәрчеге урнашкан иде. Шәһәрчек үз эченә 1,5 метр, 4,5 метр һәм 12 метр биеклектәге боз тауларын, «Кыш Бабай һәм Кар кызы», «Тәхет», «Аҗдаһа», «Боз кристаллары», боз лабиринты, «Тантамареска» һәм «Шәһәрчек» боз скульптураларын ала. Моннан тыш, шәһәрчек территориясендә боз ныгытмасы рәвешендә җылыну бүлмәсе, ике сәхнә мәйданчыгы һәм «КышДаКар-фест» Яңа ел ярминкәсе өчен 10 йорт эшләде. Боз шәһәрчеген төзү вакытында барлыгы 24 меңнән артык боз блоклары файдаланылды.