Казанда Горький паркының керү төркемен төзекләндерә башладылар

Хәзер участокта демонтаж эшләре бара.

Фото: Тышкы төзекләндерү комитеты матбугат хезмәте

(Казан шәһәре KZN.RU, 26 нчы апрель). Казанда Горький паркының керү төркемен төзекләндерә башладылар. Хәзер участокта демонтаж эшләре бара: төзүчеләр брусчатканы җыялар, баскычның бер өлешен ваткалыйлар, нигез ташларын алып ташлыйлар, туфрак һәм барлыкка килгән чүп-чарны җыялар.

Эшчеләр инде бордюрлар урнаштыра башлаганнар. Моның өчен аларны тигезлиләр һәм кискәлиләр. Аннары төзүчеләр яңа катлам салачак, агачлар, куаклар утырту һәм газонны төзекләндерү өчен туфракны алыштырачаклар.

Мәйдан эскәмияләр, өстәлләр һәм күләгә ясаучы япмалар белән актив ял итү зонасы булыр дип планлаштырыла. Бер киң баскычтан икәү ясалачак, аларны яшел зоналар аерып торачак, алар җәяүлеләр агымнарын ачык итеп бүлеп күрсәтергә ярдәм итәчәк. Төзекләндерү проекты шулай ук тукталыш павильонын яңартуны күздә тота.

Совет власте өчен һәлак булганнарның стеласы һәм Билгесез солдат һәйкәле үзгәрмәячәк, дип хәбәр итә Казан Башкарма комитетының Тышкы төзекләндерү комитетының матбугат хезмәте.

Исегезгә төшерәбез, Горький паркының керү төркеменнән тыш, быел Казанда «Уңайлы шәһәр мохитен формалаштыру» федераль проекты кысаларында 5 иҗтимагый киңлек төзекләндереләчәк. Эшләр Балыкчы бакчасында, Юныс мәйданында, Зур Зәңгәр күл территориясендә, Нокса елгасының уң ярында дәвам итәчәкләр һәм Серов урамында җәяүлеләр бульвары төзи башлаячаклар.

Шулай ук укыгыз

Барлык яңалыклар