Казандагы хоккей тартмаларында боз катыру эшләре башланды

Бу сезонда хоккейны барлыгы 82 хоккей тартмасында уйнарга мөмкин булачак

Денис Гордийко фотосы

Казан мәктәпләрендә һәм ишегалларында урнашкан 82 ачык хоккей тартмасында боз катыру эшләре башланды. Спорт объектларының тулы әзерлеге һава шартларына һәм тотрыклы салкыннар башлануга бәйле.

Боз катламын булдыру эшләре һава температурасы Цельсий буенча минус биш градустан түбән булган очракта, тотрыклы салкыннар урнашкач башлана, дип хәбәр итә Физик тәрбия һәм спорт комитеты матбугат хезмәте.

Бозны әзерләү процессы күп этаплы. Башта белгечләр әзерлек эшләрен башкара: нигез өслекне чүп-чардан чистарталар, тигезлиләр һәм тыгызлыйлар. Аннары шланглар ярдәмендә бер юлга 1-2 мм дан артык булмаган юка катлам итеп су агызу эше башлана. Бу этапта салкын суны да, кайнар суны да кулланырга була.

Тип-тигез шомалыкны тәэмин итү һәм бозда тигезсезлекләр, «дулкыннар» барлыкка килүне булдырмау өчен, су бирү юнәлешен үзгәртү техникасы катгый үтәлә.

Су салуның төп этабы тәмамланганнан соң, эшләр тукталмый. Боз катламы тиешле калынлыкны һәм тигезлекне даими саклауны таләп итә. Моның өчен даими рәвештә өстәмә су агызыла, яуган карны вакытында җыештыралар һәм чатнаган ярыкларны ямыйлар.

Исегезгә төшерәбез, бу елны Казанда тимераякта шуу өчен 105 урын әзерләнә: 83 хоккей тартмасы һәм прокат пунктлары булган 22 шугалак. Аларның җәдвалы белән KZN.RU порталының махсус бүлегендә танышырга була.

Шулай ук укыгыз

Барлык яңалыклар